Finnur Oddsson, forstjóri Haga, hefur sent frá sér tilkynningu vegna umfjöllunar fjölmiðla um byggingu atvinnuhúsnæðis við Álfabakka 2. Hann segir miður að byggingin, sem Hagar muni leigja undir ákveðinn hluta starfseminnar, hafi valdið nágrönnum óþægindum.

Í tilkynningunni fer hann yfir aðdraganda málsins og að félagið hafi gert leigusamning vegna hússins til nokkurra ára.

Misbrestur á samstarfinu

„Af umfjöllun síðustu daga og vikna má ráða að í undirbúningi þessarar framkvæmdar hafi orðið misbrestur á þessu samstarfi og ekki nægilega gætt að nágrönnum, nálægð bygginga eða starfsemi. Það er afleitt. Hagar hafa lagt áherslu á að gagnsæi ríki um fyrirhugaða starfsemi í húsinu og gert skýra kröfu á byggingaraðila um að öll tilskilin leyfi fyrir starfsemi liggi fyrir,“ segir Finnur í tilkynningunni.

Eiga sjálfsagða kröfu um að vandað sé til verka

Hann bendir einnig á að borgarbúar, íbúar hverfa og atvinnurekendur eigi sjálfsagða kröfu um að vandað sé til ákvarðana um skipulagsmál, að hægt sé að treysta þeim til lengri tíma og að umræða um skipulag og framkvæmdir sé fagleg og byggð á staðreyndum.

„Atvinnurekendur eiga mikið undir að svo sé enda eru skipulagsmál gjarnan forsenda ákvarðana er varða starfsemi fyrirtækja og krefjast verulegrar fjárfestingar og langs undirbúnings,“ segir hann.

Umræða sem er ekki við hæfi

„Í tengslum við málefni Álfabakka 2 og skipulag í Suður-Mjódd er það alvarlegt umhugsunarefni hvernig staðið hefur verið að skipulagsmálum og hvernig umræða um þau hefur oft og tíðum verið villandi eða efnislega röng. Slík umræða, m.a. af hálfu kjörinna fulltrúa, er ekki við hæfi, og sérstaklega ekki þegar hún verður til þess að skapa óvissu fyrir íbúa og óvissu um starfsemi fyrirtækja sem veita mikilvæga þjónustu, skapa fjölda starfa og skatttekjur fyrir ríki og sveitarfélag,“ segir Finnur jafnframt.

Tilkynningu Finns, fyrir hönd Haga, má lesa í heild sinni hér fyrir neðan. 

„Vegna umfjöllunar um byggingu atvinnuhúsnæðis við Álfabakka 2 vilja Hagar koma eftirfarandi á framfæri:

Högum þykir miður að byggingin við Álfabakka 2 sem félagið hyggst leigja undir ákveðinn hluta starfseminnar valdi óþægindum fyrir nágranna og hefur fullan skilning á sjónarmiðum íbúa sem fram hafa komið eftir að byggingin reis. Hagar hafa ekki tekið þátt í umræðu um Álfabakka 2 hingað til þar sem félagið er hvorki eigandi byggingarinnar né hafa Hagar beina aðkomu að byggingu hússins. Aðkoma Haga að Álfabakka 2 er sú að félagið hefur gert leigusamning vegna byggingarinnar til nokkurra ára. Húsið er byggt af fyrirtækinu Álfabakki 2 ehf., sem er félag í jafnri eigu Klettás ehf. og Eignabyggðar ehf. Eftir því sem næst verður komist hafa eigendur undirbúið framkvæmdir við Álfabakka 2 og byggt í fullu samráði við Reykjavíkurborg, fengið öll tilskilin leyfi og að öllu leyti farið eftir þeim fyrirmælum og kröfum sem gildandi skipulag og byggingarheimildir kveða á um.

Hagar og félög samstæðunnar leggja sérstaka áherslu á að styðja við þau hverfi og svæði sem þau starfa á. Þetta er m.a. gert með ábyrgum rekstri sem er fyrst og fremst í formi þjónustu, eins og aðgengi að hagkvæmum verslunarkostum, en einnig að gætt sé að starfsemi raski ekki hverfisbrag og daglegu lífi íbúa. Raunar er eitt af kjarnagildum Haga að leggja áherslu á í allri starfsemi að hafa jákvæð áhrif á samfélag og umhverfi. Þess vegna taka Hagar viðbrögðum íbúa á svæðinu og umfjöllun um nýtt atvinnuhúsnæði sem félagið hyggst taka á leigu af mikilli alvöru. Hagar hafa treyst því og gert kröfu um að eigendur hússins hafi í aðdraganda framkvæmdarinnar, og á meðan á henni hefur staðið, átt eðlilegt og gott samstarf við Reykjavíkurborg og ekki síður að Reykjavíkurborg hafi átt eðlilegt samráð við nágranna og aðra íbúa hverfisins. Þetta eru hin réttu hlutverk þeirra sem fara með skipulagsvald og framkvæmdaraðila.

Af umfjöllun síðustu daga og vikna má ráða að í undirbúningi þessarar framkvæmdar hafi orðið misbrestur á þessu samstarfi og ekki nægilega gætt að nágrönnum, nálægð bygginga eða starfsemi. Það er afleitt. Hagar hafa lagt áherslu á að gagnsæi ríki um fyrirhugaða starfsemi í húsinu og gert skýra kröfu á byggingaraðila um að öll tilskilin leyfi fyrir starfsemi liggi fyrir. Hagar óskuðu m.a. sérstaklega eftir því að byggingaraðili fengi samþykki skipulagsfulltrúa Reykjavíkurborgar fyrir starfsemi kjötvinnslu í húsnæðinu, enda forsenda leigusamnings. Samþykkið var gefið út af skipulagsfulltrúa þann 10. janúar 2023. Sem væntanlegur leigutaki með atvinnurekstur í húsinu gera Hagar þá kröfu að þegar vandamál eins og þau sem fjallað hefur verið að undanförnu koma upp, þá verði hlutaðeigendur, þ.e. skipulags- og byggingaryfirvöld og eigendur hússins, að leita lausna þannig að allir sem hagsmuna eiga að gæta geti vel við unað.

Í ljósi umræðu um stærð mannvirkisins og frágang lóðar má benda á að samkvæmt gildandi deiliskipulagi var gert ráð fyrir að töluvert stærra hús yrði byggt á lóðinni, eða allt að 15.000 m2 að flatarmáli ofanjarðar. Eigendur hússins kusu hins vegar að byggja umtalsvert minna hús eða ríflega 11.000 m2. Ekki fékkst leyfi til að minnka nýtingarhlutfall lóðarinnar og því þarf að greiða gjöld til Reykjavíkurborgar miðað við að byggingarheimildir væru fullnýttar, þ.e. miðað við þriðjungi stærra mannvirki en byggt hefur verið. Varðandi frágang lóðar þá er eðlilegt að eigendur húss vinni hann í góðri sátt og samstarfi við yfirvöld og nágranna. Vert er að nefna að þessum frágangi er ekki lokið, en Hagar vita til þess að fyrir liggja ítarlegar teikningar á skjólveggjum við lóðarmörk, gróðri og lóð umhverfis Álfabakka 2, unnar að beiðni skipulags- og byggingaryfirvalda í Reykjavík og samþykktar af þeim.

Borgarbúar, íbúar hverfa og atvinnurekendur eiga sjálfsagða kröfu um að vandað sé til ákvarðana um skipulagsmál, að hægt sé að treysta þeim til lengri tíma og að umræða um skipulag og framkvæmdir sé fagleg og byggð á staðreyndum. Atvinnurekendur eiga mikið undir að svo sé enda eru skipulagsmál gjarnan forsenda ákvarðana er varða starfsemi fyrirtækja og krefjast verulegrar fjárfestingar og langs undirbúnings. Flutningur á starfsemi eins og til stendur hjá Högum er dæmi um slíka ákvörðun, langan undirbúning, töluverða fjárfestingu og samningsbundnar skuldbindingar. Í tengslum við málefni Álfabakka 2 og skipulag í Suður-Mjódd er það alvarlegt umhugsunarefni hvernig staðið hefur verið að skipulagsmálum og hvernig umræða um þau hefur oft og tíðum verið villandi eða efnislega röng. Slík umræða, m.a. af hálfu kjörinna fulltrúa, er ekki við hæfi, og sérstaklega ekki þegar hún verður til þess að skapa óvissu fyrir íbúa og óvissu um starfsemi fyrirtækja sem veita mikilvæga þjónustu, skapa fjölda starfa og skatttekjur fyrir ríki og sveitarfélag. Sem væntanlegur leigutaki eiga Hagar að geta treyst því að ferli í tengslum við skipulag og úthlutun byggingarleyfa til handa eigenda byggingar við Álfabakka 2 hafi verið unnið samkvæmt lögum og rétt afgreidd af stofnunum Reykjavíkurborgar. Það telst í besta falli óheppilegt þegar yfirlýsingar kjörinna fulltrúa eru verulega á skjön við skipulag eða heimildir sem borgin sjálf hefur veitt.

Hagar hafa mikinn skilning á því að sambúð íbúðabyggðar og atvinnustarfsemi getur verið vandasöm, sérstaklega þar sem nálægð er töluverð eins og raun ber vitni í Álfabakkanum. Af hálfu Haga, innan þeirra marka sem hlutverk leigutaka setur, þá verður þess eins og alltaf sérstaklega gætt að starfsemi sé til fyrirmyndar, í góðri sátt við nánasta umhverfi og nágranna. Við gerum ráð fyrir að forsendur til þess verði skapaðar af skipulagsyfirvöldum og eigendum byggingarinnar að Álfabakka 2.“

Fyrir hönd Haga hf.

Finnur Oddsson

Forstjóri

Tengdar fréttir

Vöruhús við Álfabakka 2

Skella skuldinni á Búseta

• Um 1.700 hafa skrifað undir
• Ekki hægt að stöðva verkið
• Samþykkja stjórnsýsluúttekt við Álfabakka
• Ekkert athugavert við nýja vöruhúsið

» Fleiri tengdar fréttir

• Blogga um frétt