Andlát: Kristín Birna Garðarsdóttir

Kristín Birna Garðarsdóttir, fv. Íslandsmeistari í akstursíþróttum, lést á Landakoti 1. janúar síðastliðinn, 62 ára að aldri, af völdum Alzheimer.

Kristín Birna fæddist 25. ágúst 1962. Foreldrar hennar eru Anna María Samsted og Garðar Guðmunds­son. Systur eru Kamilla Björk, Linda og Lilja.

Kristín Birna ólst upp Seltjarnarnesi, bjó síðan í Reykjavík en síðustu árin búið í Mosfellsdal ásamt sinni fjölskyldu.

Hún starfaði m.a. í versluninni Virkni í Ármúla, Litaveri og síðar sem skrifstofustjóri á fasteignasölunum Remax Lind, Remax Bæ og Fasteignasölunni Bæ í Kópavogi.

Kristín Birna eignaðist mótó­kross­hjól 16 ára og varð fyrsta konan til að keppa í mótókrossi. Tók hún þátt í Íslandsmeistarkeppnum í íþróttinni árin 1979 til 1986 en hætti er hún eignaðist sitt fyrsta barn.

Hún lét það ekki stöðva sig sumarið 1986 með að taka þátt í rallýkrossi á lánuðum bíl frá vini sínum og varð fyrsta konan til að keppa. Árið 1990 eignaðist hún sinn eigin bíl og varð Íslandsmeistari í rallakstri þrjú ár í röð. Eitt árið keppti hún ólétt af sínu öðru barni, komin fjóra mánuði á leið.

Hún tók einnig þátt í torfærukeppni sumarið 1990 á sérútbúnum bíl, varð fyrsta konan til þess og hafnaði í 7. sæti. Jafnframt keppti Kristín Birna í sparakstri, ökuleikni, brautarkeppnum, kvartmílu o.fl. Þá sat hún í sjö ár í stjórn Vélhjóla­íþróttaklúbbsins.

Kristín Birna hafði einnig mikinn áhuga á flugi, fór í flugnám 1977 ásamt manni sínum og tók einkaflugmannspróf þremur árum síðar. Átti hún hlut í tveimur flugvélum.

Eftirlifandi maki Kristínar Birnu er Guðbergur Guðbergsson. Þau kynntust árið 1977 og bjuggu því saman í 47 ár, áttu sameiginlegt áhugamál í aksturíþróttunum og fluginu. Börn þeirra eru Anna Björk og Viktor og barnabörnin fjögur.

Útför Kristínar Birnu fer fram mánudaginn 13. janúar kl. 13 frá Grafarvogskirkju.