Lítillar jarðskjálftavirkni hefur orðið vart í Bárðarbungu frá því áköf jarðskjálftahrina varð þar í gærmorgun á milli kl. 6 og 9.

Stakur skjálfti af stærð 2,4 mældist kl. 17.17 síðdegis í gær, annars hefur lítill titringur orðið.

Eins og fram hefur komið var jarðskjálftahrinan sú kröftugasta frá því eldgos braust út úr eldstöðvakerfi Bárðarbungu í Holuhrauni árið 2014.

Hreyfingar í jarðskjálftunum þykja samræmast aukinni þenslu sökum kvikusöfnunar sem hefur staðið yfir frá síðustu eldsumbrotum.

Fluglitakóðinn áfram gulur

Jarðskjálftavirkni hefur farið vaxandi í Bárðarbungu og til að mynda mældust fjórir skjálftar um eða yfir 5 að stærð á síðasta ári.

Samhliða því hefur mælst hraðari aflögun vegna kvikuinnstreymis á dýpi undir Bárðarbungu.

Í tilkynningu frá Veðurstofu segir að nokkuð óvíst sé hver þróun þessarar virkni verði á næstunni og að ekki sé útilokað að jarðskjálftavirkni taki sig aftur upp.

Að svo stöddu verði fluglitakóði fyrir Bárðarbungu áfram gulur. Sólarhringsvakt Veðurstofu fylgist áfram með þróuninni.

Tengdar fréttir

Bárðarbunga

Viðbúin ef hlutirnir þróast til verri vegar

• Rólegt í Bárðarbungu
• „Þetta er okkar öflugasta eldstöð“
• Skjálfti nærri Kötlu minnir á stærð Bárðarbungu
• Hátt í tuttugu yfir 3 að stærð: Sá stærsti 5,1

» Fleiri tengdar fréttir

• Blogga um frétt