Innlent | mbl | 15.1.2025 | 16:16

Seinkun „mun hafa mjög neikvæðar afleiðingar“

Búið er að fella úr gildi virkjunarleyfi fyrir Hvammsvirkjun í Þjórsá. Tölvumynd/Landsvirkjun

Landsvirkjun segir að dómur Héraðsdóms Reykjavíkur, um að fella úr gildi virkjunarleyfi Hvammsvirkjunar, bendi til þess að við innleiðingu tilskipunar Evrópusambandsins hafi löggjafinn gert Umhverfisstofnun ókleift að að veita heimild til breytingar á vatnshloti fyrir byggingu vatnsaflsvirkjana. Þar með sé ekki hægt að gefa út virkjunarleyfi.

Þetta kemur fram í tilkynningu frá Landsvirkjun.

Í dag féll dómur héraðsdóms þar sem fram kom að Umhverfisstofnun hafi skort lagastoð til að heimila breytingu á vatnshloti og því geti virkjunarleyfið ekki staðið.

Frétt af mbl.is

Leyfi fyrir Hvammsvirkjun ógilt

Í raun gert Umhverfisstofnun ókleift að veita heimild

„Af dóminum má ráða að við innleiðingu vatnatilskipunar Evrópusambandsins hafi löggjafinn í raun gert Umhverfisstofnun ókleift að veita heimild til breytingar á vatnshloti fyrir byggingu vatnsaflsvirkjana og þar með sé ekki hægt að gefa út virkjunarleyfi.

Upphafleg gerð lagafrumvarpsins hafi gert ráð fyrir því, en nefndarálit segi annað. Vilji löggjafans birtist ekki í lagaákvæðinu sjálfu með eins skýrum hætti og æskilegt hefði verið, að því er segir í héraðsdómi,“ segir í tilkynningu Landsvirkjunar.

Leyfi Fiskistofu enn í gildi

Fram kemur að 11 landeigendur hafi höfðað mál til ógildingar á leyfi Fiskistofu og heimild Umhverfisstofnunar til breytingar á vatnshloti. Leyfi Fiskistofu er enn í gildi.

„Við útgáfu virkjunarleyfis vegna Hvammsvirkjunar var gefin út framhaldsstefna og ákvörðun Orkustofnunar um útgáfu virkjunarleyfis bættist við málið.“

Staðan í raforkukerfinu þegar mjög þröng

Landsvirkjun hyggst fara yfir forsendur dómsins og meta hver áhrif hans eru á framvindu verkefnisins. Nýjustu áætlanir gerðu ráð fyrir gangsetningu Hvammsvirkjunar árið 2029 en nú kann það að breytast.

„Frekari seinkun verkefnisins mun hafa mjög neikvæðar afleiðingar fyrir vöxt og viðgang samfélagsins, þar sem staðan í raforkukerfinu er þegar orðin mjög þröng,“ segir í tilkynningunni.