Innlent | mbl | 20.1.2025 | 13:37

Aðgerðir þýði mögulega tilflutning á fjármagni

Kristrún Frostadóttir forsætisráðherra. mbl.is/Karítas

Kristrún Frostadóttir forsætisráðherra segir væntingar ríkisstjórnarinnar af bréfi því sem sent hefur verið á forstjóra ríkisstofnana um hagræðingartillögur og fleira séu fyrst og fremst að fá allar hugmyndir upp á borðið fyrir framan bæði ríkisstjórn og hagræðingarhópinn sem settur hefur verið á laggirnar.

Í samtali við mbl.is segir hún enn fremur að það verði ekki þannig í ríkisstjórninni að hvert og eitt fagráðuneyti sé sér á báti.

Frétt af mbl.is

Bréf sent á alla forstöðumenn ríkisins

Þarf heildræna sýn

Oft hefur verið talað um að þegar forstjórar sýni aðhald og nái niður rekstrarkostnaði verði framlög til stofnana þeirra lækkuð í kjölfarið. Er líklegt að forstjórar vilji í ljósi þess draga úr kostnaði?

„Þetta er mjög góð spurning og eitt af því sem við höfum rætt í ríkisstjórn og mikilvægi þess að við séum saman í þessu verkefni.

Mikilvægi þess að fólk sé ekki bara fast í sínu ráðuneyti og það sé raunverulegur hvati til þess að fara í ákveðnar aðgerðir í sínu ráðuneyti þó það þýði mögulega tilflutning á fjármagni eitthvað annað,“ segir Kristrún. Þess vegna þurfi heildræna sýn. Svo fólk sé ekki bara fast á sínum stað.

Frétt af mbl.is

Vonast til að kynna hagræðingaraðgerðir í vor

Gulrótin að standa sig vel í starfi

Spurð hver gulrótin sé fyrir þá forstjóra sem munu leggja til hagræðingarhugmyndir segir Kristrún að gulrótin sé fyrst og fremst að vinna vel í þágu þjóðar. Ríkisstjórnin vilji að betur sé gert.

„Gulrótin hlýtur bara að vera að standa sig vel í starfi. Ég veit vel að víða eru mjög góðar hugmyndir sem fólk hefur áhuga á að koma til skila.“

Sameiningar sameininga vegna ekki góðar

Um markmið ríkisstjórnar um sameiningar ríkisstofnana segir Kristrún ýmislegt hafa verið rætt í stjórnarmyndunarviðræðunum og oft komi ýmislegt upp. Það væri þó ekki ábyrgt af henni að varpa því fram.

Spurð hvort þegar séu uppi tillögur um sameiningar hjá einstaka ráðherrum segir hún einfaldlega að það sé eitthvað sem þurfi að skoða og sameiningar sameininga vegna séu ekki góðar. Það þurfi að vera augljóst hagræði af þeim og bætt þjónusta.

„Við komum inn í þessa ríkisstjórn með það fyrir augum að vera sameinuð og samstíga. Þetta er heildrænt átak hjá okkur og ég held að það sé gott að við fáum allar þessar hugmyndir upp á sama stað og getum þá unnið heildrænt úr þeim.“