Meira um ónæmar bakteríur hér á landi
Setja bókamerki
Ein af þeim fjölmörgu ógnum sem steðja að heilsu manna þegar kemur að veirum og bakteríum hvers konar eru bakteríur sem eru ónæmar fyrir sýklalyfjum. „Miðað við önnur lönd þá er þetta ekki stórt vandamál hér. Við höfum hins vegar séð aukningu hérna,“ upplýsti Guðrún Aspelund, sóttvarnarlæknir í Dagmálum Morgunblaðsins í gær. Hún viðurkennir að heilbrigðisyfirvöld hræðist og hafi áhyggjur af þessari þróun.
Stjórnvöld hafa gefið út, fjármagnað og hrint af stað aðgerðaráætlun til að hefja baráttuna gegn þessum bakteríum og sýklalyfjaónæmi. Sú áætlun miðar að fræðslu og vöktun með sýklalyfjanotkun og segir Guðrún að áætlunin tengist fjölmörgum stofnunum.
Bakteríur sem sýklalyf virka ekki á eru víða um heim vaxandi vandamál. Sóttvarnarlæknir bendir á að við slíkar aðstæður séu fá úrræði eftir til meðhöndlunar fyrir sjúkling. Hún gerir ekki lítið úr þörfinni fyrir sýklalyf og ítrekar mikilvægi þeirra en nefnir að áríðandi sé að stemma stigu við notkun þeirra og jafnframt að fylgjast með að þau séu rétt notuð.
Ein af ógnum framtíðarinnar
„Þetta er eitthvað sem við þurfum að sinna eins og önnur lönd. Við erum ekki það einangruð frá heiminum lengur að svona komi ekki hingað. Við erum með þessa sömu hluti en þetta er ekki orðið stórt vandamál hér og við erum að reyna að grípa inn í,“ viðurkennir hún.
Í Dagmálaviðtalinu fer Guðrún Aspelund yfir margvíslegar hættur sem steðja að mannkyninu eða kunna að steðja að. Þar eru ónæmar bakteríur ofarlega á löngum lista. „Þetta er eitt af stóru málunum og þegar verið er að tala um ógnir einmitt framtíðarinnar að þá er þetta líka ofarlega á blaði. Það gæti orðið mikið af veikindum og jafnvel dauðsföllum í framtíðinni, ef við grípum ekki þarna inn í.“
Hér er hægt að hlusta á hluta umræðunnar um aðgerðaráætlun stjórnvalda gegn fjölónæmum bakteríum. Viðtalið við sóttvarnarlækni geta áskrifendur Morgunblaðsins horft á með því að smella á hlekkinn hér fyrir neðan.
Þykir gott að flóðin féllu
Bendir hveitifyrirtæki á kærumöguleika
Stefnt að afgreiðslu Íslandsbankasölu á vorþingi
Stakk móður sína yfir tuttugu sinnum
Inga Sæland fyrir og eftir ráðherrastólinn
Ákærður fyrir tilraun til manndráps
Íbúar komnir heim á ný