„Afar mikilvægt“ að hrinda verkefninu í framkvæmd

Lögregla hefur ekki komið sér upp búnaði til að fylgjast með sakborningum sem hafa brotið ítrekað gegn nálgunarbanni.

Sigríðar J. Friðjóns­dóttur rík­is­sak­sókn­ara segir afar mikilvækt að rafrænni vöktun, þ.e. notkun ökklabanda, verði hrint í framkvæmd, bæði hvað varðar nálgunarbann sem og úrræði í stað gæsluvarðhalds eða farbanns.

Vísir greindi fyrst frá málinu.

Ein tegund ökklabands. mbl.is/Árni Sæberg

Rafræn vöktun afar mikilvæg

„Tækjabúnaður lögreglu er á ábyrgð dómsmálaráðherra/ráðuneytis og ríkislögreglustjóri sér um framkvæmdina fyrir hönd ráðherra. Það er afar mikilvægt að rafrænni vöktun/notkun ökklabanda verði hrint í framkvæmd, bæði hvað varðar nálgunarbann og ekki síður sem úrræði í stað gæsluvarðhalds og/eða farbanns,“ segir í svari ríkissaksóknara við fyrirspurn mbl.is.

Embættið gaf út fyrirmæli til lögreglu í febrúar á síðasta ári sem meðal annars fólu í sér að krafa yrði gerð á að sakborningur, sem ítrekað brýtur gegn nálgunarbanni en ekki er talin ástæða til að sæti gæsluvarðhaldi, hafi á sér ökklaband svo unnt sé að fylgjast með ferðum hans.

Dómari getur krafist ökklabands

Í ákvæðum laga um meðferð sakamála segir að ef skilyrði gæsluvarðhalds séu fyrir hendi geti dómari mælt fyrir um vistun sakbornings á sjúkrahúsi eða viðeigandi stofnun, bannað honum brottför af landinu eða lagt fyrir hann að halda sig á ákveðnum stað eða innan ákveðins svæðis í stað þess að úrskurða hann í gæsluvarðhald.

Dómari getur þá krafist þess að sakborningur hafi á sér búnað svo að unnt sé að fylgjast með ferðum hans.

• Blogga um frétt