Beit í sundur vöðva og sinar

Kona sem varð fyrir árás hunds á Akureyri í síðustu viku axlarbrotnaði í átökum við hundinn. Þá náði hundurinn að bíta í sundur vöðva og sinar í handlegg konunnar.

Frá þessu greinir akureyrski miðillinn Vikublaðið sem ræddi við konuna.

Konan var flutt til aðhlynningar á Sjúkrahúsið á Akureyri með sjúkrabíl. Vikublaðið greinir frá því að auka læknar hefðu verið kallaðir út til að gera að sárunum á handlegg konunnar.

Konan, sem kom ekki fram undir nafni, segir í samtali við miðilinn að atvikið hafi verið eitt það skelfilegasta sem hún hefur lent í.

Frétt af mbl.is

Hundur réðst á konu á Akureyri

Skyndileg árás

Að sögn konunnar var árásin mjög skyndileg. Hún hafi verið að ganga fram hjá ungum manni sem var með Rottweiler í ól þegar hann réðst á hana og beit í handlegg hennar.

„Hann er það kraftmikill og sterkur að hann rífur mig niður í götuna og heldur mér alveg fastri þannig að ég gat ekkert gert,“ er haft eftir konunni í Vikublaðinu.

Hún segist verða frá vinnu um nokkurra mánaða skeið eftir árásina.

Einnig er fjallað um árásina og rætt við konuna á vef Akureyri.net.

Lögreglan hefur óskað eftir því að þeir sem urðu vitni að árásinni gefi sig fram við lögreglu eða hafi samband í síma 444-2800.

• Blogga um frétt