Fimm þúsund færri hús umsagnarskyld

Umsagnarskylda Minjastofnunar Íslands vegna framkvæmda mun taka til umtalsvert færri húsa og mannvirkja ef áform Jóhanns Páls Jóhannssonar, umhverfis-, orku- og loftslagsráðherra, um breytingar á lögum um menningarminjar ná fram að ganga. 

Í tilkynningu á vef Stjórnarráðsins segir að núverandi umsagnarskylda krefjist mikillar vinnu af hendi sérfræðinga Minjastofnunar og eigenda eldri húsa og geti þannig unnið gegn markmiðum um vandaða minjavörslu. 

Jóhann Páll hyggst leggja fram á vorþingi frumvarp um breytingu á viðmiðunarártali vegna umsagnarskyldu Minjastofnunar Íslands um eldri hús. Um er að ræða hús og önnur mannvirki sem byggð voru eftir árið 1923 og njóta því ekki aldursfriðunar.

Í gildandi lögum miðast umsagnarskyldan við árabilið 1924-1940 og nær til tæplega 8400 húsa. Samkvæmt áformunum, sem leggja á fyrir þing á vorþingi, yrði árabilið stytt og síðara ártalinu breytt í 1930. 

Þessi breyting myndi hafa áhrif á 4.941 hús og mannvirki á þann hátt að eigendur þeirra þyrftu ekki lengur að leita sérstakrar umsagnar Minjastofnunar Íslands vegna breytinga sem þeir hyggjast gera á húseignum sínum.

Liður í hagræðingu

„Markmiðið er að lágmarka stjórnsýslubyrði, auka skilvirkni og tryggja að Minjastofnun geti einbeitt sér að verndun þeirra minja sem raunverulega er ástæða til að vernda,“ er haft eftir Jóhanni Páli á vef Stjórnarráðsins.

Hann segir að breytingin sé liður í miklu víðtækari aðgerðum sem ríkisstjórnin stendur fyrir um hagræðingu, einföldun stjórnsýslu og skarpari forgangsröðun við ráðstöfun opinbers fjár.

• Blogga um frétt