Veður tekur að versna á landinu upp úr hádegi en spáð er suðaustan hvassviðri eða stormi með rigningu og asahláku.

Veðurstofan hefur gefið út appelsínugular og gular viðvaranir og taka fyrstu viðvaranir gildi á höfuðborgarsvæðinu, Faxaflóa og á Suðurlandi klukkan 12. Klukkutíma síðar taka í gildi appelsínugular viðvaranir á Breiðafirði og á hálendinu og klukkan 17 á Suðausturlandi. Snemma í fyrramálið skellur svo á appelsínugul viðvörun á Ströndum og Norðurlandi vestra. 

Frétt af mbl.is

Spáð vonskuveðri um allt land

„Spáin er að ganga eftir. Þetta er suðaustan stormur sem byrjar fyrst vestalands upp úr hádegi. Þessu fylgir mikil rigning og það má búast við asahláku á Suðausturlandi og á höfuðborgarsvæðinu,“ segir Björn Sævar Einarsson, veðurfræðingur á Veðurstofu Íslands, í samtali við mbl.is.

Hætta er á krapaflóðum, snjóflóðum og skriðum

Mikil úrkoma og hláka getur valdið vatnavöxtum, krapaflóðum og skriðuhættu og á það sérstaklega við á Austfjörðum, Suðurlandi og á Suðausturlandi. Snjór er á öllu landinu og getur hætta skapast á votum snjóflóðum og síðar krapaflóðum þegar hlánar skart.

Hann segir að það verði mjög hvasst á vestanverðu landinu í dag og um tíma í fyrramálið en vindinn fari að lægja þegar það fari að nálgast hádegi og það kólni í kjölfarið.

Frétt af mbl.is

Varað við veðri, krapaflóðum og skriðum um helgina

Björn segir að í kvöld geti hitinn náð allt að átta stigum en í fyrramálið geti hitinn komist í allt að tólf stig á Norðurlandi.

Enn ein lægðin á sunnudagskvöld

Von er á enn einni lægðinni á sunnudaginn og að sögn Björns Einars skellur lægðin á vestanverðu landinu á sunnudagskvöld með austan hvassviðri, hlýindum og rigningu sunnanlands. Hann segir að veðrið gangi niður um nóttina og á mánudaginn verði útsynningur með éljum og kólnandi veðri.

„Það eru sannkallaðar umhleypingar í veðrinu hjá okkur. Það hlýnar og frystir til skiptis,“ segir Björn.

Tengdar fréttir

Veður

Varað við snörpum vindhviðum

• Vegurinn um Súðavíkurhlíð opnaður á ný
• Spáð vonskuveðri um allt land
• Fauk í flest skjól á Suðurnesjum
• Segir hættustigið forvörn fyrir helgina

» Fleiri tengdar fréttir

• Blogga um frétt