Vilja leyfa fólki að reykja vímuefni í neyslurýmum

Til skoðunar er að veita heilbrigðisstofnunum heimild til þess að reka neyslurými. Einungis sveitarfélög hafa heimild til þess núna.

Í febrúar mun Alma Möller heilbrigðisráðherra leggja fram frumvarp um breytingu á lögum um ávana- og fíkniefni. Breytingarnar eru m.a. þess efnis að fólki sem notar neyslurými verði heimilt að nota þar vímuefni, óháð aðferð.

Frétt af mbl.is

Svona er plan ríkisstjórnarinnar

Myndi draga úr sýkingum

„Eins og leiðin er í dag þá er einungis leyfilegt að nota vímuefni í æð. En það eru margir notendur farnir að reykja vímuefni,“ segir Alma í samtali við mbl.is og nefnir að því vilji ráðuneytið bæta við lögin að fólk megi reykja vímuefni í rýminu.

„Og það er alltaf mjög gott að vera ekki að sprauta sig því það eru svo miklir fylgikvillar við það.“ 

Í lýsingu frumvarpsins kemur einmitt fram að með því að heimila fólki að nota í rýmunum vímuefni óháð aðferð sé það skaðaminnkandi aðgerð sem m.a. dragi úr sýkingum.

Frétt af mbl.is

Nýtt neyslurými opnað í Borgartúni

Frétt af mbl.is

Mikil ánægja með neyslurýmið

Vilja auka líkur á að neyslurýmum sé komið upp

Þá nefnir Alma að einnig sé til skoðunar að hafa í frumvarpinu heimild til heilbrigðisstofnana til þess að reka neyslurými en það sé einungis á færi sveitarfélaga eins og staðan er núna.

„Þar er kannski verið að hugsa um landsbyggðina ef þörf er á og að auka fjölbreytnina í því hverjir mega reka neyslurými.

Eins og ég segi er það einungis heimild fyrir sveitarfélög í dag. Það er verið að auka líkur á að það sé komið upp neyslurýmum.“

Frétt af mbl.is

„Eitt andlát af völdum fíkniefna er alltaf einu of mikið“

• Blogga um frétt