Endurskoða reglur um endurgreiðslu námslána

Svokallaður spretthópur hefur verið skipaður um endurskoðun reglna um endurgreiðslu námslána í námslánakerfi Lánasjóðs íslenskra námsmanna, forvera Menntasjóðs námsmanna.

Logi Einarsson, menningar-, nýsköpunar- og háskólaráðherra skipaði þrjá fulltrúa í spretthópinn en hópnum eru gefnir þrír mánuðir til að skila niðurstöðum sínum og tillögum. Þetta kemur fram í tilkynningu frá Stjórnarráði Íslands.

Í tengslum við kjarasamninga vorið 2024 gaf þáverandi ríkisstjórn út yfirlýsingu þar sem hún hét því að ráðast í breytingar á lögum um Menntasjóð námsmanna með það að markmiði að létta vaxtabyrði og draga úr skyndilegum og ófyrirséðum hækkunum vegna verðbólgu og vaxta á afborganir námslána. Breytingarnar áttu að gagnast þeim sem hófu lánshæft nám eftir 2020 – tóku H-lán.

Frétt af mbl.is

Námslánakerfið útilokandi og uppfylli ekki hlutverk sitt

Tryggja jafnræði milli greiðenda

Hópnum er ætlað að vinna að því að tryggja jafnræði á milli greiðenda eldri lána LÍN og nýrri H-lána og er verkefni hans að kortleggja áhrif endurgreiðslufyrirkomulags eldri lána LÍN með tilliti til áhrifa á ævitekjur. Sérstaklega er hópnum falið að skoða áhrif mögulegra afskrifta í tengslum við eftirlaunaaldur og stöðu lántakenda með hæstu lánin.

Markmið breytinga sem gerðar voru við stofnun Menntasjóðs námsmanna var að tryggja að endurgreiðslu námslána lyki fyrir eftirlaunaaldur sem á ekki við um fyrra kerfi LÍN og því er talið mikilvægt að skoða samræmi þar á milli, að því er kemur fram í tilkynningunni.

Í spretthópnum sitja:

Sveinn Andri Matthíasson, formaður – án tilnefningar
Sigrún Brynjarsdóttir – tilnefnd af Bandalagi háskólamanna
Gylfi Þorsteinn Gunnlaugsson – tilnefndur af fjármála- og efnahagsráðuneytinu.

Hópnum ber að skila niðurstöðum sínum og tillögum, ef einhverjar eru, eigi síðar en 12. maí 2025.

Frétt af mbl.is

„Ekki furða að íslenskir stúdentar vinni svona mikið“

Fjórir fulltrúar skipaðir í stjórn

Þá hefur menningar-, nýsköpunar- og háskólaráðherra skipað fjóra fulltrúa í stjórn Menntasjóðs námsmanna en hlutverk stjórnar er m.a. að móta áherslur í starfi sjóðsins, hafa eftirlit með starfsemi og fjárreiðum hans, gera tillögur til ráðherra að úthlutunarreglum og skera úr um vafamál.

Lögum samkvæmt skipar nýr ráðherra málaflokksins fjóra fulltrúa í stjórn Menntasjóðsins og taka þeir sæti þeirra fulltrúa sem fyrri ráðherra skipaði án tilnefningar, en núverandi stjórn situr til 30. júní 2026, að því er fram kemur í tilkynningu Stjórnarráðs.

• Blogga um frétt