Sigrún Ólöf Ingólfsdóttir, skólastjóri Hörðuvallaskóla, segir að grunnskóla skorti mjög úrræði þegar kemur að alvarlegum ofbeldis- og hegðunarvandamálum.

Henni þykir algengara nú orðið að starfsfólk grunnskólanna tali um að vera hrætt í starfi og kallar eftir aðgerðum af hálfu bæði ríkis og sveitarfélaga.

Hún segir úrræðaleysið víðtækt og að það blasi við að börn eigi í miklum tilfinningalegum vanda, þar með talin börn með hegðunarvanda sem jafnvel beita ofbeldi.

„Þetta byrjar allt í börnunum þegar þau eru ung og ef þau fá ekki viðeigandi hjálp, hvar endar þetta?“ spyr hún í samtali við Morgunblaðið í dag.

Fjöldi nemenda liðið fyrir úrræðaleysið

Greint var í blaðinu á mánu­dag frá viðvar­andi of­beldi sem nem­end­ur á miðstigi í Breiðholts­skóla hafa þurft að þola af hálfu hóps sam­nem­enda sinna í nokk­ur ár.

Lýsti faðir einn­ar stúlku því hvernig hann hefði leitað á náðir ým­issa stofn­ana til að vinna bug á vand­an­um, án ár­ang­urs.

Of­beldið hef­ur verið lík­am­legt, kyn­ferðis­legt og and­legt og hef­ur fjöldi nem­enda þurft að líða fyr­ir úrræðal­eysi skóla­yf­ir­valda. 

Aðstoðarskólastjóri skólans benti á að úrræði stæðu skól­um í Reykja­vík til boða en að lang­ir biðlist­ar þvældust fyrir. Æskilegt væri ef sér­skól­ar gætu tekið við fleiri nem­end­um, eða að fleiri slík­ir skól­ar væru til staðar.

Frétt af mbl.is

Börn þora ekki í skólann

Orðið algengara og erfiðara að eiga við

Sigrún segir það ljóst að mikil þörf sé á aðgengilegum og viðeigandi úrræðum fyrir börn sem þurfa á þeim að halda, svo að hefðbundið skólastarf geti haldið áfram og börnum liðið vel innan veggja skólans.

Hún bendir á að hlutverk kennara sé fyrst og fremst að mennta börnin, auk þess að vera viss um að hverjum og einum nemanda líði vel í skólanum.

Að hennar mati hefur starf kennara færst sífellt meira út fyrir þetta hlutverk.

„Mikill tími í starfi kennarans fer í að leysa úr alls konar ágreiningsmálum,“ segir Sigrún. Stærri og stærri mál teljist með tímanum eðlilegri innan skólans.

„Mál sem manni þóttu mikil fyrir stuttu, eru orðin svo lítil núna í stóra samhenginu,“ bætir hún við.

„Þessi atvik eins og lýst er í Breiðholtsskóla – þetta er orðið algengara og það er orðið erfiðara að eiga við þetta.“

Frétt af mbl.is

„Það er fjarstæðukennt að segja þetta“

Ítarlegar er rætt við Sigrúnu á síðu 6 í Morgunblaðinu í dag.

Tengdar fréttir

Skólakerfið í vanda

Birtingarmynd af skóla án aðgreiningar?

• Vill öryggismyndavélar í skólana
• Sum börn hafa verið á biðlistum stóran hluta ævinnar
• Þingið fjallar um börn í viðkvæmri stöðu
• Foreldrar lýsa ofbeldinu: „Börn eru lamin í frímínútum“

» Fleiri tengdar fréttir