Innlent | mbl | 14.2.2025 | 13:27

„Menn eru mjög fastir hver á sínum haug“

Ástráður Haraldsson ríkissáttasemjari heldur áfram að reyna að gera tillögur í kjaradeilu kennara. mbl.is/Árni Sæberg

Áfram verður fundað í kjaradeilu Félags framhaldsskólakennara og ríkisins hjá ríkissáttasemjara í dag. Samninganefndir hafa fundað í vikunni um tæknilegar útfærslur sem snúa eingöngu að framhaldsskólakennurum og segir ríkissáttasemjari þau samtöl hafa gengið ágætlega.

„Það hefur haldið áfram í þessu sama samtali og við höfum verið með í gangi alla vikuna. Það gengur misjafnlega á milli daga, en það er samt lifandi, það er ekki dautt,“ segir Ástráður Haraldsson ríkissáttasemjari í samtali við mbl.is.

Ekki hefur enn verið boðað til sameiginlegs fundar samninganefnda leik-, grunn- og tónlistarkennara og Sambands íslenskra sveitarfélaga, en síðast var fundað í kjaradeilunni á mánudag. Þá þótti ríkissáttasemjara ekki tilefni til að boða nýs til fundar að svo stöddu.

Ástráður segir fólk þó alltaf vera að tala saman, en hann hitti til að mynda samninganefndir kennara í gær og samninganefnd sveitarfélagana í vikunni.

Frétt af mbl.is

Þetta eru kröfur kennara: Ætla ekki að gefa eftir

„Þá gerist ekki neitt“

Magnús Þór Jónsson, formaður Kennarasambands Íslands, sagði í samtali við mbl.is í gær kennara ekki ætla gefa eftir kröfu um forsenduákvæði, sem felur í sér uppsögn á kjarasamningi, hugnist þeim ekki staðan á eða útkoman úr þeirri virðismatsvegferð sem lagt er upp með í innanhústillögu ríkissáttasemjara.

Þá gera þeir einnig kröfu um meiri innspýtingu en 20 prósent launahækkanir sem eru nú í boði á samningstímanum.

Inga Rún Ólafsdóttir, formaður samninganefndar Sambands íslenskra sveitarfélaga, hefur hins vegar sagt að sveitarfélögin hafi teygt sig eins langt og þau geti hvað varðar launahækkanir til kennara. Jafnframt að sveitarfélögunum hugnist ekki hafa forsenduákvæði jafn snemma á samningstímanum og kennarar gera kröfu um

Frétt af mbl.is

Á þessu stranda samningar í kjaradeilu kennara

„Það eru þarna sjónarmið sem eru andhverf og er erfitt að samræma. Menn eru mjög fastir hver á sínum haug,“ segir Ástráður.

En hvað gerist þá?

„Þá gerist ekki neitt.“

Hvað gerir maður eins og þú þá?

„Ég er búinn að vera að reyna að gera tillögur og ég er ekki hættur því, en maður verður að reyna að búa til forsendur fyrir því að það séu líkur til að tillagan skipti máli og geti hreyft við málum. Ég held áfram að skoða það.“

Frétt af mbl.is

Hafa ekki náð saman um stóru ásteytingarsteinana

Vilja breytingar á innanhústillögunni

Ríkissáttasemjari lagði fram innanhústillögu í kjaradeilunni í lok janúar, sem hefði verið ígildi kjarasamnings hefðu allir aðilar samþykkt hana. Þar var lagt upp með að deilan um jöfnun launa á milli markaða yrði leyst með virðismati á störfum kennara.

Ríki og sveitarfélög samþykktu tillöguna, en ekki kennarar. Þeir eru tilbúnir að fara virðismatsleiðina, með ákveðnum skilyrðum, en gera kröfu um að forsenduákvæði sé flýtt og að meiri innspýting sé sett í launahækkanir á samningstímanum.