„Öllum mikið áfall og veldur óhug“

Jón Páll Haraldsson, skólastjóri í Laugalækjarskóla, hefur sent bréf til foreldra þar sem þeim er tilkynnt um að skotvopn hafi fundist á þaki skólans í gærkvöldi eftir árshátíð í Laugardalshöll. Hann segir nemendur hafi haft beint samband við lögreglu í kjölfar fundarins. Jón segir atvikið mikið áfall og valdi óhug.    

Frétt af mbl.is

Fundu skotvopn í Laugalækjarskóla

Engin skotfæri fundust

„Hér þarf ég að flytja ykkur mjög óhugguleg tíðindi sem koma aftan að okkur öllum. Eftir farsæla árshátíð í Laugardalshöll héldu nemendur skólans heim í háttinn. Í góða veðrinu skruppu nokkrir nemendur upp á þak skólans. Þó það sé ekki beint í leiðinni heim eða leyfilegt í neinum skilningi þá gerist það reglulega að krakkar klifri þar upp.

Á afviknum stað uppi á þakinu ráku krakkarnir augu í poka sem þeim fannst ekki eiga heima þar. Í ljós kom að í pokanum var eitthvað sem þau töldu vera skotvopn, sem hefur nú verið staðfest. Krakkarnir höfðu strax samband við lögreglu sem kom á svæðið og tók vopnið. Engin skotfæri fundust,“ segir m.a. í bréfi Jóns Páls.

Vopnið fannst á þaki skólans eftir að nemendur höfðu prílað þar upp. Af vef Reykjavíkurborgar

Getur ekki tengt við neitt í skólastarfinu 

„Þetta er okkur öllum mikið áfall og veldur óhug. Fyrir mitt leyti get ég þó ekki með nokkru móti tengt þetta við eitt né neitt í skólastarfinu undanfarna mánuði,“ segir Jón Páll sem jafnframt hvetur foreldra að ræða málið við börn sín. 

• Blogga um frétt