Innlent | mbl | 17.2.2025 | 13:15 | Uppfært 18.2.2025 11:20

Borgin setur fjórar einbýlishúsalóðir á sölu

Lóðirnar voru boðnar út á liðnu ári en tilboð sem bárust voru metin of lág. mbl.is/Ómar

Reykjavíkurborg segir að byggingarréttur á fjórum einbýlishúsalóðum í Grundarhverfi á Kjalarnesi sé boðinn til sölu á föstu verði.

Lóðirnar eru Helgugrund 9, 11 og 12 og Búagrund 16. Heimilt er að byggja 250 – 280 m2 hús á lóðunum, sem eru staðsettar í útjaðri gróins hverfis, að því er segir á vef Reykjavíkurborgar.

Þar segir að stærð lóðanna sé á bilinu 700-800 fermetrar með nýtingarhlutfallið 0,35, sem ráði stærð byggingar á lóð.

„Svo dæmi sé tekið um stærð húss sem byggja má, þá er lóðin Helgugrund 9 um 718 fm, sem þýðir að á þeirri lóð er heimilt að byggja allt að 251 fm einbýlishús,“ segir í tilkynningunni.

Lóðirnar eru í útjaðri Grundarhverfis á Kjalarnesi. Ljósmynd/Reykjavíkurborg

Tilboð sem bárust metin of lág

Lóðirnar voru á liðnu ári boðnar út, en tilboð sem bárust voru metin of lág og eru þær nú samkvæmt ákvörðun borgarráðs 12. desember nú boðnar á föstu verði með hliðsjón af verðmati tveggja óvilhallra aðila að sögn borgarinnar.

Verð lóðanna tekur mið af nýtingarhlutfalli lóðar, sem er 0,35 skv. gildandi deiliskipulagi:

Helgugrund 9. Lóð er um 718 m2 og má því byggja allt að 251 m2 íbúðarhús. Fast verð er kr. 8.684.600.

Helgugrund 11. Lóð er um 811 m2 og má því byggja allt að 284 m2 íbúðarhús. Fast verð er kr. 9.826.400.
Helgugrund 12. Lóð er 819 m2 og má því byggja allt að 287 m2 íbúðarhús. Fast verð er kr. 9.930.200.
Búagrund 16. Lóð er 808 m2 og má því byggja allt að 283 fm. íbúðarhús. Fast verð er kr. 9.791.800.

Verðið miðast við byggingarvísitölu og er framreiknað í samræmi við þróun vísitölunnar til greiðsludags. Auk greiðslu fyrir byggingarrétt greiðir lóðarhafi gatnagerðargjöld og önnur lögbundin gjöld að sögn borgarinnar.