Útkall barst frá fiskibáti á Húnaflóa

Skipstjóri fiskibáts óskaði eftir aðstoð utarlega á Húnaflóa í morgun eftir að net höfðu farið bæði í aðalskrúfu bátsins sem og hliðarskrúfu sem olli því að ekki var hægt að sigla bátnum fyrir eigin vélarafli.

Var áhöfn Húnabjargarinnar, björgunarskips Slysavarnafélagsins Landsbjargar á Skagaströnd, kölluð út.

Þetta kemur fram í tilkynningu Landsbjargar.

Húnabjörgin lagði úr höfn á Skagaströnd skömmu fyrir klukkan 10. Í tilkynningunni segir að á vettvangi hafi verið hæglætisveður og lítil hætta á ferðum.

Sigling Húnabjargar tók rétt tæpa tvo tíma og um hádegisbil var búið að koma taug á milli og haldið í átt til Skagastrandar.

Gekk drátturinn vel, þó hægt væri farið, en skipin sigldu til lands á um 6 til 7 sjómílna hraða.

Komu bátarnir til hafnar um klukkan 5.

• Blogga um frétt