Innlent | mbl | 20.2.2025 | 17:38

Nýr borgarstjóri kosinn á morgun

Hér má sjá oddvita flokkanna sem munu á morgun að öllum líkindum kynna nýjan meirihluta. Ljósmynd/Aðsend

Búið er að kalla saman aukafund í borgarstjórn á morgun þar sem á dagskrá er að kjósa nýjan borgarstjóra, forseta borgarstjórnar og nýtt borgarráð.

Nýr meirihluti, skipaður fimm vinstriflokkum, mun því væntanlega taka við stjórnartaumunum í borginni á morgun.

Á heimasíðu borgarinnar má sjá dagskrá aukafundarins sem haldinn verður á morgun.

Ýmis mál eru á dagskrá, þar á meðal að leysa sitjandi íbúaráð frá störfum og fresta kosningum í ný íbúaráð.

Vísir greindi fyrst frá.

Frétt af mbl.is

Segjast langt komnar með viðræður í borginni

„Þetta eru bara stjórnarskipti í borginni“

Þórdís Lóa Þórhallsdóttir, forseti borgarstjórnar, segir ljóst að Samfylkingin, Flokkur fólksins, Sósíalistar, Vinstri græn og Píratar hafi komist að samkomulagi um nýjan meirihluta í Reykjavík.

„Þetta eru bara stjórnarskipti í borginni. Skýr og greinileg merki um það. Þannig þessir fimm flokkar hafa komist að einhverri niðurstöðu og óska eftir aukafundi í borgarstjórn,“ segir Þórdís.

Dagskrá aukafundarins:

Kosning forseta borgarstjórnar og fjögurra varaforseta.
Kosning borgarstjóra.
Kosning tveggja skrifara til og tveggja til vara.
Kosning fimm varafulltrúa í forsætisnefnd.
Kosning sjö borgarráðsfulltrúa og sjö til vara; formannskjör.
Tillaga borgarfulltrúa Samfylkingar, Pírata, Sósíalistaflokks Íslands, Flokks fólksins og Vinstri grænna að breyttu hlutverki mannréttinda- og ofbeldisvarnarráðs.
Kosning sjö fulltrúa í mannréttindaráð og sjö til vara; formannskjör.
Kosning sjö fulltrúa í menningar- og íþróttaráð og sjö til vara; formannskjör.
Kosning sjö fulltrúa í skóla- og frístundaráð og sjö til vara; formannskjör.
Kosning sjö fulltrúa í stafrænt ráð og sjö til vara; formannskjör.
Kosning sjö fulltrúa í umhverfis- og skipulagsráð og sjö til vara; formannskjör.
Kosning sjö fulltrúa í velferðarráð og sjö til vara; formannskjör.
Kosning í almannavarnanefnd.
Kosning í innkaupa- og framkvæmdaráð.
Tillaga borgarfulltrúa Samfylkingar, Pírata, Sósíalistaflokks Íslands, Flokks fólksins og Vinstri grænna að leysa sitjandi íbúaráð frá störfum og fresta kosningum í ný íbúaráð.