Innlent | mbl | 22.2.2025 | 11:15

„Þetta er grafalvarleg staða“

Eyjólfur Ármannsson, samgöngu- og sveitarstjórnarráðherra, mun óska eftir fundi með Vegagerðinni á mánudaginn. Samsett mynd mbl.is/Karítas/Ljósmynd/Vegagerðin

Eyjólfur Ármannsson, samgöngu- og sveitarstjórnarráðherra, segir að upp sé komin grafalvarleg staða þegar kemur að vegum Vesturlands. Hann hyggst óska eftir fundi með Vegagerðinni á mánudag til að fara yfir stöðuna.

Í viðtali við mbl.is í síðustu viku sagði Björg Ágústsdóttir bæjarstjóri Grundarfjarðarbæjar vegina á Vesturlandi marga hverja vera stórhættulega. Nefndi hún t.a.m. að bílar yrðu stundum óökufærir er þeir keyrðu vegina og að íbúar þyrftu þá að láta sækja sig.

Frétt af mbl.is

Stórhættulegir vegir og fólk búið að fá nóg

Benti hún á að aukið fjármagn þyrfti til Vesturlands og kallaði eftir því að Alþingi myndi samþykkja neyðarfjárveitingar á þessu ári svo laga mætti verstu kafla veganna.

Í kjölfarið ræddi mbl.is við Bergþóru Þorkelsdóttur vegamálastjóra.

„Við erum alvarlega undirfjármögnuð í viðhaldi og búin að vera það í langan tíma þannig að við erum komin með talsvert marga vegi sem eru bara á brotpunkti,“ sagði Bergþóra í samtali við undirritaðan þá.

Frétt af mbl.is

Á alvarlegum stað vegna langvarandi fjárskorts

Hefur rætt málið við forsætisráðherra

„Þetta er grafalvarleg staða og við erum að skoða málið. Ég mun óska eftir fundum með Vegagerðinni á mánudaginn og fara yfir málið betur,“ segir Eyjólfur Ármansson við mbl.is að loknum ríkisstjórnarfundi í gær.

Segist ráðherrann hafa rætt málið við Kristrúnu Frostadóttur forsætisráðherra.

„Það er alveg ljóst hvað mun gerast ef það kemur ekki aukið fé í málaflokkinn.“

Vísar hann þar til þess þegar bundið slitlag var tekið af vegum á Vesturlandi sökum þess hve illa þeir voru farnir. Þess í stað var komið upp malarvegum. Í samtali við Ríkisútvarpið í vikunni sagði Vegamálastjóri að slíkt gæti endurtekið sig.

Frétt af mbl.is

„Viðhaldið er bara verulega svelt“

„Þessi ríkisstjórn ætlar að vinna í viðhaldsskuld“

Aðspurður segir Eyjólfur neyðarfjárveitingar vera til skoðunar. Vitað sé hvað muni gerast ef ekki verður farið í aðgerðir.

Þú ætlar að óska eftir fundi, ertu vongóður um að það fari að sjást einhverjar breytingar?

„Það verður bara að koma í ljós. Þessi ríkisstjórn ætlar að vinna í viðhaldsskuld og það er alveg klárt mál að það er mikil viðhaldsskuld þarna,“ segir ráðherrann og bætir við:

„Verðmæti vega í landinu eru 1.200 milljarðar og við verðum að halda vegakerfinu við.“