Innlent | Morgunblaðið | 24.2.2025 | 7:49

Foreldrar ræði ekki við fjölmiðla

Samkvæmt heimildum Morgunblaðsins voru foreldrar beðnir um að leita ekki til fjölmiðla með frásagnir af ofbeldi í skólanum. mbl.is/Karítas

Foreldrar nokkurra nemenda í Breiðholtsskóla krefjast þess að skóla- og frístundaráð grípi til tafarlausra aðgerða vegna stöðu nemenda í 7. bekk í skólanum. Hafa þeir sent yfirlýsingu þess efnis á ráðið.

Eins og Morgunblaðið og mbl.is greindu frá hefur eineltis- og ofbeldisvandi þrifist í árganginum í nokkur ár.

Fjallað hefur verið um hvernig ekki hafi verið brugðist við ákalli foreldra sem fóru fram á að málin yrðu tekin föstum tökum.

Faðir stúlku í árganginum sagði í samtali við blaðið að nánast engin kennsla hefði farið fram í árganginum og að börn væru í svo miklu streituástandi að það væri erfitt fyrir þau að meðtaka upplýsingar.

Frétt af mbl.is

Foreldrar lýsa ofbeldinu: „Börn eru lamin í frímínútum“

Umfjöllunin vakti skólayfirvöld til vitundar

Fundir voru haldnir í síðustu viku með foreldrum nemenda í 6. og 7. bekk þar sem málið var rætt.

Samkvæmt heimildum Morgunblaðsins voru foreldrar beðnir um að leita ekki til fjölmiðla með frásagnir af ofbeldi í skólanum.

Frásagnir sem þó urðu til þess, eftir umfjöllun Morgunblaðsins, að skólayfirvöld vöknuðu að því er virðist til vitundar um vandann og ætli að grípa inn í „af miklum þunga“, eins og fráfarandi formaður skóla- og frístundaráðs orðaði það.

Frétt af mbl.is

Birtingarmynd af skóla án aðgreiningar?

Vilja sjá raunhæfa áætlun yfir aðgerðir

Í yfirlýsingu sem foreldrarnir sendu á ráðið í síðustu viku er þess krafist að börnum í bekknum verði tryggður sálrænn, félagslegur og námslegur stuðningur strax, þar með talið aðgengi að sálfræðingum, námsráðgjöf og sérstökum úrræðum fyrir börn sem hafa orðið fyrir áfalli.

Foreldrarnir segja skort á skýrum svörum eða aðgerðum til að bæta stöðu barnanna og vilja sjá raunhæfa aðgerðaáætlun frá skóla- og frístundaráði.

Þá vilja foreldrar að borgaryfirvöld komi á reglulegri upplýsingagjöf til foreldra þar sem foreldrar hafi ítrekað upplifað skort á gagnsæi og upplýsingagjöf um aðgerðir og viðbrögð.

Telja foreldrarnir að ofbeldismenningin í Breiðholtsskóla hafi varpað ljósi á hvernig kerfið hafi brugðist börnunum. Því fara þau fram á heildstæða endurskoðun á hvernig skólakerfið bregðist við erfiðum aðstæðum og tryggi að réttindi barna séu virt, óháð því hvaða skóla þau sækja.