Tíundi borgarstjórinn á öldinni

Heiða Björg Hilmisdóttir er 23. borgarstjóri Reykjavíkur og fimmta konan til að gegna embættinu. Hún er tíundi borgarstjórinn á þessari öld og hefur nú rúmlega 15 mánuði í embættinu fram að næstu kosningum.

Heiða var fyrst kjörin í borgarstjórn árið 2015 og hefur hún því sinnt starfi borgarfulltrúa í heilan áratug. Hún hefur gegnt ýmsum trúnaðarstörfum innan Samfylkingarinnar á borð við það að hafa verið varaformaður flokksins.

Eftir að Dagur B. Eggertsson hætti í borgarstjórn, til þess að fara inn á þing, tók Heiða Björg við keflinu sem oddviti Samfylkingarinnar í borginni.

Frétt af mbl.is

Heiða Björg er nýr borgarstjóri

Stormasamt að undanförnu

Nýr meirihluti var kynntur á föstudaginn og flokkarnir sem mynda þann meirihluta eru Samfylkingin, Sósíalistar, Píratar, Flokkur fólksins og Vinstri græn.

Auk þess að vera nú borgarstjóri er hún einnig formaður Sambands íslenskra sveitarfélaga og hefur verið heldur stormasamt hjá henni þar að undanförnu í tengslum við kjaraviðræður kennara.

Frétt af mbl.is

Borgarstjóri lék einleik: Kom flatt upp á stjórnina

Hér má sjá oddvitana í nýja meirihlutanum. mbl.is/Árni Sæberg

Merkir menn gegnt embættinu

Árni Sæberg, ljósmyndari Morgunblaðsins, náði góðri ljósmynd af Heiðu fyrir framan vegg þar sem er búið að lista fyrrverandi borgarstjóra Reykjavíkur. Hægt er að sjá myndina efst í fréttinni. 

Á myndinni má sjá nöfn á borð við Jón Þorláksson, Bjarna Benediktsson eldri, Gunnar Thoroddsen, Davíð Oddsson, Ingibjörgu Sólrúnu, Dag B. Eggertsson og Einar Þorsteinsson.

Núna styttist væntanlega í það að nafni hennar verði bætt við á vegginn.

Undantekning að endast lengi síðustu áratugi

Frá árinu 1908, þegar Páll Einarsson varð fyrsti borgarstjóri Reykjavíkur, til ársins 2003, þegar Ingibjörg Sólrún hætti sem borgarstjóri, voru alls 14 borgarstjórar.

Gróflega reiknað þá þjónaði hver borgarstjóri að meðaltali í hátt í sjö ár á þessu tímabili.

Frá árinu 2003 til ársins 2025 er hins vegar allt aðra sögu að segja. Á aðeins 22 árum hafa verið 10 borgarstjórar og hefur hver borgarstjóri því þjónað í að meðaltali rúmlega tvö ár.

Á þessu tímabili kemur Dagur B. Eggertsson tvisvar við sögu sem borgarstjóri en í seinna skiptið var hann borgarstjóri í tæplega 10 ár.

Með fimmtán mánuði til stefnu

Helga er því að taka við starfi þar sem flestir hafa ekki enst lengi á undanförnum áratugum og sjálf hefur hún bara um 15 mánuði fram að næstu kosningum.

Þó er ekki útilokað að hún verði borgarstjóri lengur en það, ef sveitarstjórnarkosningarnar eru henni í vil.

Þá er heldur ekki útilokað að hún verði í styttri tíma en 15 mánuði þar sem um er að ræða fimm flokka meirihluti sem hún fer fyrir.

1. Jón Þorláksson 1932 - 1935.
2. Pétur Halldórsson 1935 – 1940.
3. Bjarni Benediktsson var settur borgarstjóri frá 8. október 1940 til 9. janúar 1941. Kosinn frá 9. janúar 1941 til 4. febrúar 1947.
4. Gunnar Thoroddsen frá 4. febrúar 1947 til 6. október 1960.
5. Auður Auðuns og Geir Hallgrímsson voru settir borgarstjórar frá 19. nóvember          1959 til 6. október 1960.
6. Geir Hallgrímsson var kosinn borgarstjóri frá 6. október 1960 til 1. desember 1972.
7. Birgir Ísleifur Gunnarsson frá 1. desember 1972 til 28. maí 1978.
8. Egill Skúli Ingibergsson frá 15. ágúst 1978 til 27. maí 1982.
9. Davíð Oddsson frá 27. maí 1982 til 16. júlí 1991.
10. Markús Örn Antonsson frá 16. júlí 1991 til 17. mars 1994.
11. Árni Sigfússon frá 17. mars 1994 til 13. júní 1994.
12. Ingibjörg Sólrún Gísladóttir frá 13. júní 1994 til 1. febrúar 2003.
13. Þórólfur Árnason frá 1. febrúar 2003 til 1. desember 2004.
14. Steinunn Valdís Óskarsdóttir frá 1. desember 2004 til 13. júní 2006.
15. Vilhjálmur Þ. Vilhjálmsson frá 13. júní 2006 til 16. október 2007.
16. Dagur B. Eggertsson frá 16. október 2007 til 24. janúar 2008.
17. Ólafur F. Magnússon frá 24. janúar 2008 til 21. ágúst 2008.
18. Hanna Birna Kristjánsdóttir frá 21. ágúst 2008 til 15. júní 2010.
19. Jón Gnarr frá 15. júní 2010. til 16. júní 2014.
20. Dagur B. Eggertsson frá 16. júní 2014 - 16. janúar 2024.
21. Einar Þorsteinsson frá 16. janúar 2024 - 21. febrúar 2025
22. Heiða Björg Hilmisdóttir frá 21. febrúar 2025.

• Blogga um frétt