Innlent | mbl | 26.2.2025 | 13:03

Fjórar skrifstofur í staðinn fyrir tvö svið

Breytingar hafa verið gerðar á stjórnkerfi og skipuriti Kópavogsbæjar. mbl.is/Hjörtur

Breytingar hafa verið gerðar á stjórnkerfi og skipuriti Kópavogsbæjar en í breytingunum felst að stjórnsýslusvið og fjármálasvið bæjarins verða lögð niður.

Í stað þeirra verða til fjórar skrifstofur um verkefni sviðanna: Skrifstofa umbóta og þróunar, skrifstofa þjónustu, skrifstofa mannauðs og kjaramála og skrifstofa áhættu- og fjárstýringar.

Þetta kemur fram í tilkynningu frá Kópavogsbæ en breytingarnar voru samþykktar á fundi bæjarstjórnar Kópavogs í gær. Bætt þjónusta við íbúa, aukin skilvirkni og skýrari hlutverk og ábyrgð stjórnsýslunnar eru meginmarkmið breytinganna.

Fram kemur enn fremur í tilkynningunni að bæjarritari verði í skipuriti næstráðandi bæjarstjóra og verður yfirmaður lögfræðiþjónustu, skjalaþjónustu og þjónustu við bæjarstjóra og fastanefndir. Skrifstofustjórar heyra beint undir bæjarstjóra eins og sviðsstjórar fagsviða.

Í takt við breyttar þarfir

„Kópavogsbær er stækkandi sveitarfélag og það var orðið tímabært að endurskoða stjórnsýslu bæjarins í takt við breyttar þarfir. Meginmarkmið breytinganna er að skýra og skerpa hlutverk miðlægrar stjórnsýslu,“ er haft eftir Ásdísi Kristjánsdóttur, bæjarstjóra Kópavogs, í tilkynningunni.

Hún segir að efla eigi þjónustu við íbúa bæjarins meðal annars með aukinni stafrænni þjónustu. Þá eigi áfram að standa vörð um góðan rekstur og ábyrga áhættu- og fjárstýringu með því að efla greiningar á rekstri einstakra málaflokka, þvert á svið og skrifstofur hjá Kópavogsbæ.

Auglýst verður á næstu dögum eftir skrifstofustjórum þriggja af fjórum nýrra skrifstofa: Þjónustustjóra, umbóta- og þróunarstjóra og áhættu- og fjárstýringarstjóra. Núverandi mannauðsstjóri verður yfir skrifstofu mannauðs- og kjaramála.

Framkvæmdastjórn sveitarfélagsins verður í kjölfar breytinganna auk bæjarstjóra skipuð bæjarritara, mannauðsstjóra, þjónustustjóra, áhættu- og fjárstýringarstjóra, umbóta- og þróunarstjóra, sviðsstjóra velferðarsviðs, sviðsstjóra menntasviðs og sviðsstjóra umhverfissviðs.

Breytingarnar taka gildi um næstu mánaðamót.