Hér að neðan getur að líta tímalínu sem blaðið hefur tekið saman og varðar helstu atburði sem tengjast málinu. Í flestum tilvikum byggjast upplýsingarnar á opinberum gögnum frá opinberum rannsakendum.

2021

Apríl

Starfsmenn RÚV virkja símanúmerið 680-2140, en það er nauðalíkt símanúmeri Páls sem er 680-2141.

24. apríl

Eiginkona Páls Steingrímssonar leysir út svefnlyfið Imovane sem hann hafði útvegað henni lyfseðil fyrir.

29. apríl

Páll Steingrímsson skipstjóri kemur í land af Bergi VE og tekur gistingu á Hótel Óðinsvéum. Eiginkona hans vitjar hans og býður honum drykk. Hann þiggur ekki drykkinn og flýtir för til Akureyrar.

30. apríl

Aðalsteinn Kjartansson hættir á RÚV og flytur sig yfir á Stundina.

2. maí

Seint um kvöld þiggur Páll bjór úr hendi konu sinnar. Finnst bragðið skrítið og hefur orð á því að það sé rammt.

3. maí

Tvö um nóttina vaknar Páll mikið veikur. Kemst við illan leik yfir til nágranna sinna og hnígur þar niður. Lætur viðstadda, meðal annars sjúkraflutningamenn, vita að hann telji að sér hafi verið byrluð ólyfjan. Fluttur á Sjúkrahúsið á Akureyri og lendir þar nokkrum sinnum í hjartastoppi.

Læknar berjast við að halda honum á lífi og gefa honum meðal annars móteitur við mögulegri eitrun af völdum zópíklóns, virka efnisins í Imovane.

4. maí

Páll er fluttur á sjúkrahús í Reykjavík. Dætur hans og þáverandi tengdamóðir mæta á flugvöllinn fyrir norðan og er sagt að kveðja Pál. Mjög tvísýnt sé um líf hans.

5. maí

Eiginkona Páls afhendir Þóru Arnórsdóttur og Arnari Þórissyni við þriðja mann farsíma Páls og segir þeim að í símanum séu gögn sem eigi ríkt erindi við almenning.

6. maí

Páll kemst til meðvitundar eftir að hafa legið í öndunarvél frá því að veikindin herjuðu á hann. Sér á Samsung-aðgangi að farsími hans er staðsettur í Efstaleiti 1, þar sem höfuðstöðvar RÚV eru.

Eiginkonan sækir símann að nýju í Efstaleiti og kemur honum til Páls ásamt öðrum persónulegum eigum hans.

11. maí

Páll útskrifast af Landspítala og fer með flugi norður til Akureyrar.

12. maí

Páll skoðar símtæki sitt og sér merki þess að það hafi verið afritað.

14. maí

Páll fer til lögreglu og kærir meinta afritun til lögreglu en getur ekki gefið nánari lýsingu á því hver hafi verið þar að verki.

20. maí

Páll gefur skýrslu hjá lögreglunni á Akureyri.

Aðalsteinn Kjartansson á Stundinni og Þórður Snær Júlíusson á Kjarnanum hafa samband með tíu mínútna millibili og bera væntanlega frétt undir Pál. Byggðist sú umfjöllun á gögnum sem áttu það öll sammerkt að vera vistuð á farsíma hans.

21. maí

Kjarninn og Stundin birta fyrstu fréttir af hinni svokölluðu „Skæruliðadeild Samherja“.

Páll fer aftur til lögreglunnar og kærir eiginkonu sína til lögreglu og vísar á blaðamennina tvo.

24. ágúst

Þóra Arnórsdóttir á í sms-samskiptum við eiginkonu Páls. Þær finna tíma til að mæla sér mót. Eiginkonan er á sama tíma í samskiptum við símanúmerið 680-2140 og er það merkt ÞAK í símaskrá hennar. Af samskiptunum að dæma er Þóra Arnórsdóttir í Kveik einnig hinum megin línunnar þar.

Þennan dag undirbúa þær einnig að koma síma eiginkonu Páls í hendur „huldumanns“ á vegum RÚV, sem fékk það verkefni að skoða rafræn fótspor í síma hennar, kanna meðal annars mögulegt innbrot í hann og fleira.

25. ágúst

Þóra og eiginkonan hittast á kaffihúsinu Yndisauka í Efstaleiti. Hafði Þóra beðið konuna um að skila sér hvítum Nokia-síma og hleðslusnúru sem hún hafði látið hana hafa.

3. september

Þóra Arnórsdóttir segist í sms-skilaboðum ætla að hitta eiginkonuna „eftir helgi“.

15. september

Réttarlæknisfræðileg matsgerð gefin út að beiðni lögreglu. Blóðprufur sýndu ekki merki eitrunar en ekki var skimað fyrir zópíklóni á meðan veikindi Páls gengu yfir. Niðurstaðan að ekki væri hægt að komast að niðurstöðu um hvað olli veikindunum. Ekki væri útilokað að sjúklingurinn hefði innbyrt efni/lyf sem ekki var skimað fyrir á sjúkrahúsinu.

3. október

Eiginkona Páls sendir Láru V. Júlíusdóttur lögmanni sínum póst og gefur þar Þóru Arnórsdóttur og Aðalsteini Kjartanssyni umboð til þess að fá símkort úr hennar eigu, og aðgang að öllum gögnum sem hana varða og eru í vörslu lögmannsins.

5. október

Eiginkonan hringir í Þóru Arnórsdóttur og varir símtalið milli þeirra í 6:46 mínútur.

6. október

Eiginkonan mætir til yfirheyrslu hjá lögreglu. Viðurkennir þar að hafa byrlað Páli svefnlyf í bjór. Segist hafa gert það eftir að hafa komist í ósæmilegt myndefni sem sýndi Pál með annarri konu. Hún hafi snöggreiðst og eitrað fyrir honum. Viðurkennir einnig að hafa afhent fjölmiðlum símann en tilgreinir ekki hvar eða hverjum.

6. nóvember

Rakel Þorbergsdóttir fréttastjóri RÚV segir upp störfum. Hafði þekkt eiginkonu Páls í áratugi, æft með henni handbolta og starfað með henni hjá Útgerðarfélagi Akureyringa.

22. nóvember

Páll gefur skýrslu að nýju hjá lögreglu. Upplýsir þar að eiginkona sín hafi sagt sér á liðnu sumri að hún hefði afhent starfsfólki RÚV símann.

2022

5. janúar

Eiginkona Páls mætir til yfirheyrslu. Tjáir sig ekki um efnisatriði máls og upplýsir ekki hverjum hún afhenti símann.

13. janúar

Helgi Seljan hættir á Ríkisútvarpinu og hefur störf á Stundinni sem „rannsóknarritstjóri“.

14. febrúar

Ríkisútvarpið greinir frá því að „þrír rannsóknarblaðamenn“ hafi verið kallaðir til yfirheyrslu hjá lögreglu vegna umfjöllunar um hina meintu skæruliðadeild. Það voru blaðamennirnir Aðalsteinn Kjartansson, Arnar Þór Ingólfsson og Þórður Snær Júlíusson. Síðar um kvöldið greinir RÚV frá því að Þóra Arnórsdóttir ritstjóri Kveiks hafi einnig verið kölluð til skýrslutöku. Þau hafi öll réttarstöðu sakbornings í málinu.

Formaður Blaðamannafélagsins fordæmir „afskipti lögreglu af rannsóknarblaðamönnunum og segir þau óskiljanleg og óverjandi“, eins og RÚV orðar það í frétt. „Hún segir það ljóst að í málinu hafi almannahagsmunir vegið þyngra en friðhelgi einkalífs,“ segir þar enn fremur.

20. febrúar

Stefán Eiríksson útvarpsstjóri og Heiðar Örn Sigurfinnsson, nýr fréttastjóri RÚV, senda frá sér yfirlýsingu og segja meðal annars: „Forsenda fyrir því að fjölmiðlar geti rækt hlutverk sitt er að þeir geti aflað upplýsinga um mál sem hafa þýðingu fyrir almenning og miðlað þeim án afskipta annarra.“ Er þar einnig ítrekað mikilvægi þess að fjölmiðlamenn geti staðið vörð um heimildarmenn sína.

11. ágúst

Skýrsla tekin af Arnari Þór Ingólfssyni. Svarar ekki efnislega og ber við vernd heimildarmanna.

29. ágúst

Þóra Arnórsdóttir gefur skýrslu. Tjáir sig ekki um sakarefni og ber við trúnaði við heimildarmann.

Aðalsteinn Kjartansson gefur skýrslu. Neitar að tjá sig en segist ekki hafa verið í neinum tengslum við eiginkonu Páls.

2023

11. janúar

Lögregla óskar skýringa frá Stefáni Eiríkssyni útvarpsstjóra um hver hafi verið notandi að símanúmerinu 680-2140.

17. janúar

Þriðja skýrsla tekin af Páli. Hann vitnar til samtals við fyrrverandi eiginkonu sína þar sem hún segist hafa afhent Helga Seljan símann.

6. febrúar

Þóra Arnórsdóttir hættir á RÚV. Degi síðar tilkynnt um ráðningu hennar til Landsvirkjunar.

8. mars

Lögregla óskar ítarlegri upplýsinga frá útvarpsstjóra um reikninga og gögn er varða símanúmerið 680-2140 á tímabilinu 1.4. 2021-1.9. 2021.

13. mars

Ingi Freyr Vilhjálmsson, blaðamaður á Heimildinni, áður Stundinni, mætir til skýrslutöku. Neitar að tjá sig um meint tengsl við eiginkonu Páls. Ber við trúnaði við heimildarmenn.

14. mars

Þóra Arnórsdóttir í skýrslutöku hjá lögreglu öðru sinni. Neitar að sjá sig um sakarefni.

2024

30. maí

Skýrsla tekin af Páli Steingrímssyni. Þar upplýsir hann að fyrrverandi eiginkona sín hafi tjáð sér að Arnar Þórisson aðalframleiðandi Kveiks hafi veitt símanum viðtöku.

21. júní

Ingi Freyr Vilhjálmsson ráðinn til fréttastofu RÚV og hættir á Heimildinni.

12. júlí

Fyrrverandi eiginkona Páls upplýsir að Þóra Arnórsdóttir hafi tekið við símanum ásamt Arnari Þórissyni. Hún fær m.a. að sjá mynd af honum og er viss í sinni sök. Nefnir að nýju þriðja mann sem enn hefur ekki verið upplýst hver er.

11. september

Þóra Arnórsdóttir mætir til skýrslutöku þriðja sinni. Neitar að svara spurningum lögreglu, m.a. um fundi sem hún átti með eiginkonu Páls.

Arnar Þórisson mætir til skýrslutöku. Hann neitar að hafa hitt fyrrverandi konu Páls í Efstaleiti. Neitar allri aðkomu að málinu.

26. september

Lögregla hættir rannsókn á málinu.

23. október

Páll kærir ákvörðun lögreglu til ríkissaksóknara.

2025

8. janúar

Lögregla sendir ríkissaksóknara gögn og skýringar er varða ákvörðun þess efnis að hætta rannsókninni.

23. janúar

Ríkissaksóknari staðfestir ákvörðun lögreglu um að hætta rannsókn á þeim hluta málsins sem laut að blaðamönnunum sem málinu tengdust og einnig byrluninni. Lögreglu falið að rannsaka áfram möguleg brot fyrrverandi eiginkonu Páls gegn friðhelgi einkalífs hans.

7. febrúar

Páll Steingrímsson mætir í ítarlegt viðtal í Spursmálum og segir frá sinni hlið málsins.

Stefán Eiríksson útvarpsstjóri hafnar því að mæta í viðtal í Spursmálum og ber við að hann hafi engar forsendur til að tjá sig um málið.

10. febrúar

Heiðar Örn Sigurfinnsson hafnar boði um viðtal á vettvangi Spursmála. Segist ekki hafa forsendur til að tjá sig um málið. Hafði þó gert það á Facebook þremur dögum fyrr.

20. febrúar

Logi Einarsson menningarmálaráðherra segist munu fara yfir hlut RÚV í byrlunarmálinu svokallaða.

21. febrúar

Stefán Eiríksson hafnar öðru sinni boði í viðtal á vettvangi Spursmála.

24. febrúar

Eva Hauksdóttir lögmaður Páls sendir bréf til stjórnskipunar- og eftirlitsnefndar Alþingis og óskar atbeina hennar til að rannsaka málið, einkum hlut RÚV og starfsmanna þess í því.