Þorgerður Katrín Gunnarsdóttir utanríkisráðherra ítrekaði mikilvægi þess að Ísland efldi enn frekar samstarf við bandalagsríki og styrkti eigin getu til að tryggja stöðuvitund, öryggi, varnir og áfallaþol sitt í opnunarávarpi á málþingi um öryggismál í gær. 

Málþingið var á vegum Varðbergs, samtaka um vestræna samvinnu og alþjóðamál, og unnið í samstarfi við utanríkisráðuneytið. 

„Það dylst engum að við stöndum á krossgötum, hvað varðar öryggismál Evrópu og þá um leið í okkar eigin öryggis- og varnarmálum,“ sagði Þorgerður Katrín.

Þorgerður Katrín í pontu í gær. Ljósmynd/Utanríkisráðuneytið

„Það er ekki valkostur“

„Grunnstoðirnar í vörnum landsins eru að mínu mati óbreyttar, en krefjast aukinnar virkni og ræktarsemi. Þar skipta aðildin að Atlantshafsbandalaginu og varnarsamningurinn við Bandaríkin mestu máli. Landfræðileg lega Íslands fyrir öryggi- og varnir Norður-Ameríku og Evrópu vegur hér þungt. Það þýðir þó ekki að við getum alfarið treyst á aðra. Það er ekki valkostur. Við viljum hafa áhrif á okkar stöðu með virkri þátttöku og samstarfi,“ sagði Þorgerður. 

Í ávarpi sínu áréttaði utanríkisráðherra mikilvægi áframhaldandi stuðnings við varnarbaráttu Úkraínu og samstöðu vestrænna ríkja. Ísland yrði áfram málsvari alþjóðalaga, mannréttinda og lýðræðis.

Þá tók Þorgerður Katrín þátt í pallborðsumræðum ásamt tveimur fyrrverandi utanríkisráðherrum, Ingibjörgu Sólrúnu Gísladóttur og Þórdísi Kolbrúnu Reykfjörð Gylfadóttur, þar sem breytt öryggislandslag og þörfin á uppbyggingu innviða, þekkingar og getu á sviði öryggis- og varnarmála á Íslandi var til umræðu.

Málþinginu var streymt og upptöku má finna á vef Varðbergs. 

Frétt af mbl.is

Beint: Öryggismál í öndvegi

Tengdar fréttir

Varnarmál Íslands

Kristrún: Góð samskipti við Bandaríkin skipta sköpum

• Hefur rætt við Hegseth og vill tala við Rubio
• „Raunveruleikinn sem við horfumst í augu við í dag“
• Fóru yfir stöðuna með stórveldunum
• Vinna „sem ein heild“ í utanríkisráðuneytinu

» Fleiri tengdar fréttir

• Blogga um frétt