Rafbyssu beitt þegar maður réðst að lögreglu með hamra

Lögreglan varð að beita rafbyssu á mann í Helluhverfi í Hafnarfirði á mánudag.

Að sögn Skúla Jónssonar aðstoðaryfirlögregluþjóns var maðurinn vopnaður tveimur hömrum og hlýddi ekki fyrirmælum lögreglu.

Maðurinn réðist þá að lögregluþjónum með hamrana á lofti að sögn Skúla.

„Vonandi fær hann hjálp“

Lögregla yfirbugaði þá manninn með rafbyssu og var hann í kjölfarið vistaður á viðeigandi heilbrigðisstofnun.

„Hann var bara vitu sínu fjær, vonandi fær hann hjálp,“ segir Skúli í samtali við mbl.is.

Skúli segist ekki vita um ástand eða líðan mannsins í dag, og ekki vita til þess að hann hafi verið undir nokkrum áhrifum áfengis eða vímuefna.

Rafbyssur nýlega teknar í notkun

Um er að ræða þriðja sinn sem rafbyssu er beitt af lögreglu á Íslandi, en Vísir greindi fyrst frá því og hafði eftir embætti ríkislögreglustjóra.

Rafbyssur voru teknar í notkun hjá ís­lensku lög­regl­unni í byrj­un sept­em­ber á síðasta ári og var slíku beitt í fyrsta skipti á landinu þann 17. desember.

Frétt af mbl.is

Rafbyssu beitt í fyrsta skipti

• Blogga um frétt