Hvað eiga tíkallasímar, hugtakið fæðufullveldi og borgarstjóraknús sameiginlegt? Jú, allt þetta þrennt mátti sjá bregða fyrir á samfélagsmiðlum íslensks stjórnmálafólks í vikunni. Skyggnst var inn í stjórnmálastarfið eins og það birtist á samfélagsmiðlum í nýjasta þætti Spursmála.

Eins og vitað er er aldrei lognmolla yfir pólitíkinni hér á landi. Í vikunni fóru fram borgarstjóraskipti í Ráðhúsinu, fyrsta kjördæmavikan í þinginu gekk í garð og fulltrúar þjóðarinnar ferðuðust vítt og breitt utan landsteinanna. Í myndskeiðinu sem fylgir hér að ofan má sjá brot af því helsta sem fram fór á samfélagsmiðlum stjórnmálaaflanna. Þeirri yfirferð er einnig gert skil hér að neðan.

Þorgerður Katrín á fartinni

Það var brjálað að gera hjá Þorgerði Katrínu Gunnarsdóttur, eða Togga Gunn eins og hún er kölluð í hlaðvarpsheiminum, en hún talaði máli Úkraínu í kjölfar þess að þrjú ár eru nú liðin frá innrás Rússa í landið.

Þá ávarpaði hún mannréttindaráð Sameinuðu þjóðanna í fyrsta sinn og lagði áherslu á mannréttindi og tilverurétt fólks.

Fæðufullveldið

Virkasti þingmaðurinn á samfélagsmiðlum: Snorri Másson, tók kjördæmavikuna með trompi og lærði til að mynda nýtt orð: Fæðufullveldi. Þegar hugtakinu er slegið upp hjá Árnastofnun skilar það þó engum niðurstöðum. 

Krúttað borgarstjóraknús

Eftir allt stormviðrið í borginni hreppti Heiða Björg Hilmisdóttir borgarstjórastólinn í liðinni viku og er hún fimmta konan til að gegna því embætti. Hér faðmar hún forvera sinn í drasl og nú fellur væntanlega allt í ljúfa löð í borginni.

K-Frost í Kænugarði

Kristrún Frosta gekk á fund Selenskís í Kænugarði á dögunum og var þar viðstödd minningarathöfn. Ferðalaginu til Úkraínu deildi hún á félagsmiðlum þar sem 10 klukkustunda lestarferð var partur af prógramminu. Sem betur fer var hún í góðum félagsskap.

Tíkallasími í Búðardal

Jón Gnarr steig inn í tímavél og hvarf aftur til fortíðar þar sem hann hringdi í mömmu sína úr tíkallasíma í Búðardal.

Langþráður landsfundur

Flokkur fólksins hélt langþráðan landsfund og kom öllu sínu í stand líkt og alvöru stjórnmálaflokkum sæmir.

Fyrsti Norðurlandaráðsfundurinn í Kaupmannahöfn

Þær Dagbjört Hákonardóttir og Halla Hrund Logadóttir skelltu sér til kóngsins Köben og sóttu sinn fyrsta fund á vegum Norðurlandaráðs.

Kvaddi borgarstjórnarstólinn

Einar Þorsteinsson fráfarandi borgarstjóri gerði upp borgarstjóratíð sína, sem stóð yfir í rúmlega ár, með hjartnæmri myndafærslu á Instagram. En þegar einar dyr lokast þá opnast aðrar og í sömu viku greindi hann frá því að hann og eiginkona hans, Milla Ósk Magnúsdóttir, eiga von á litlu kríli von bráðar.

Jón fór í fýlu

Jón Gunnarsson varpaði svo sprengju inn í raðir Sjálfstæðismanna í aðdraganda landsfundar þar sem hann sakaði flokkssystur sína og ísdrottninguna Guðrúnu Hafsteinsdóttur um að eigna sér sín verk. „Stay classy“ Nonni.

Elon Musk í miklu stuði

Erlend stjórnmál verða farsakenndari með hverjum deginum en hér sést niðurskurðarkeisarinn Elon Musk taka við keðjusög frá Milei, hinum hárprúða forseta Argentínu, og sveifla henni á fjöldafundi í Maryland. Allt mjög eðlilegt.

Tengdar fréttir

Spursmál

Í fangelsi með 1,1 milljón á tímann

• „Pólitískur titringur eða byrjendamistök“
• Framkvæmdin brot á stjórnarskrá lýðveldisins
• Umbúðalaus hótun Eflingar
• #67. - Stjórnarskrárbrot, kjaraklípa og Trumpað ástand

» Fleiri tengdar fréttir

• Blogga um frétt