Segir stórtjón hafa orðið vegna sjávarflóða

Þór Sigurgeirsson, bæjarstjóri á Seltjarnarnesi, segir stórtjón hafa orðið þegar sjór flæddi yfir varnargarða í morgun og inn í hús við Suðurströnd Seltjarnarness og víðar. Hann varar við því að búast megi við svipuðum aðstæðum í kvöld og hvetur fólk til að gera ráðstafanir.

Slökkvilið var með mannskap frá þremur slökkviliðsstöðum í allan morgun og fram yfir hádegi við að dæla sjó upp úr kjöllurum víða á svæðinu við strandlengjuna frá Skerjafirði og út að Fiskislóð. 

Sjór flæddi yfir varnargarða vegna hárrar sjávarstöðu og hvassviðris en varað hafði verið við stórstreymi. Þá bárust grjóthnullungar inn á lóðir og göngustíga.

Frétt af mbl.is

Landhelgisgæslan varar við stórstreymi

Þór segir að sjór hafi farið alveg upp að þessu húsi og pollur myndast í kring. Ljósmynd/Þór Sigurgeirsson

Dældu sjó úr að minnsta kosti sex húsum

Dæla þurfti sjó úr kjöllurum í að minnsta kosti sex húsum, að sögn varðstjóra hjá slökkviliðinu á höfuðborgarsvæðinu. Tjónið er töluvert, sérstaklega í kjöllurum og á neðri hæðum húsanna. 

„Við erum búin að vera að frá því fyrir klukkan níu í morgun, síðasti bíllinn var bara að koma inn núna,“ segir Bjarni Ingimarsson, varðstjóri hjá slökkviliðinu á höfuðborgarsvæðinu, í samtali við mbl.is.

„Það flæddi sjór yfir varnargarðana í morgun en það var háflóð klukkan átta í morgun. Það flæddi sjór alveg upp að húsunum og það var alveg upp í 60 sentímetrar af vatni fyrir utan húsin og svo lak inn.“

Frétt af mbl.is

Grasbalinn orðinn að grýttri fjöru

Ljósmynd/Þór Sigurgeirsson

Allir göngustígar illa laskaðir eða ónýtir

Bæjarstjórinn á Seltjarnarnesi birti færslu á íbúasíðu Seltjarnarness fyrr í dag þar sem hann sagði mikið tjón hafa orðið hjá íbúum og hvatti fólk til að tilkynna tjón strax til tryggingafélaga. 

„Það lá tjörn í kringum þetta hús og upp að gluggunum þarna. Kjallarinn á þessu húsi var hálffullur af vatni og á fleiri húsum í kring. Ég var þarna í morgun með slökkviliðinu á milli átta og hálfníu,“ segir Þór í samtali við mbl.is. Parket og húsgögn hafi skemmst.

„Svo eru allir göngustígarnir hjá okkur í kringum Nesið illa laskaðir eða ónýtir,“ segir hann jafnframt.

„Það er búist við öðru eins stórstreymisflóði og suðvestanátt eins og var í nótt aftur.“

Grjóthnullungar voru víða á lóðum í Skerjafirðinum. Ljósmynd/Ólafur William Hand

• Blogga um frétt