Þurftu að aflýsa flugi frá Las Palmas

Flugvél á vegum Icelandair gat ekki lent á flugvellinum á Las Palmas á Kanaríeyjum í dag vegna mikillar rigningar á svæðinu og þurfti hún að lenda á flugvellinum á Tenerife. 

Þetta segir Guðni Sigurðsson upplýsingafulltrúi Icelandair. 

Hann segir að eftir stutt stopp á Tenerife sé vélin komin aftur í loftið og flýgur nú til Las Palmas. Það þurfti þó að aflýsa fluginu frá Las Palmas til Keflavíkur vegna hvíldartíma áhafnar. 

Ferðamenn varaðir við

Nýtt flug hefur verið sett upp síðdegis á morgun til að koma farþegunum heim. Búið er að láta farþegana vita og geta þeir bókað sér hótel í nótt á kostnað flugfélagsins. 

Úrhellingsrigning á Gran Canaria og Tenerife hefur valdið usla síðustu daga. Flóð hafa myndast víðast hvar og hefur sjö ströndum í bænum Telde verið lokað til að tryggja öryggi almennings. 

Ferðamenn eru varaðir við því að ferðast á staði þar sem spáð er mikilli rigningu. 

• Blogga um frétt