„Aðstöðuleysið er enn vandamál“

Mikill skortur er á bæði fyrirlestrastofum og kennsluhúsnæði fyrir verklega kennslu við Háskóla Íslands sem bitnað hefur illa á læknadeild HÍ.

Þetta kemur fram í nýrri grein í Læknablaðinu þar sem fjallað er um læknaskort á Íslandi. Í greininni er rætt við þau Þórarin Guðjónsson, forseta læknadeildar HÍ, og Þórdísi Jónu Hrafnkelsdóttur, kennslustjóra læknadeildar.

Viðbótarfjármagn fylgdi ekki fjölgun nemenda

Þau segja að árið 2019 hafi nemendum verið fjölgað úr 48 í 60. Fjölguninni hafi ekki fylgt viðbótarfjármagn og því ekki möguleiki á nýráðningum kennara. Þau benda á að þegar nemendum fjölgaði á síðari námsárunum hafi þörf fyrir fleiri kennara komið berlega í ljós, meðal annars vegna aukins umfangs verklegrar kennslu.

„Á klínísku árunum (ár 4-6) þurfti því að hagræða talsvert. Deildin fékk loks aukið fjármagn árið 2023, sem gerði kleift að fjölga í 75 nemendur haustið 2024. Vandinn við fjölgun nema er þó ekki einungis bundinn við klínísku kennsluna. Mikill skortur er á bæði fyrirlestrastofum og kennsluhúsnæði fyrir verklega kennslu við HÍ sem bitnað hefur illa á Læknadeild. Nýtt hús Heilbrigðisvísindasviðs HÍ (NHHÍ) mun væntanlega leysa þann vanda,“ segir í greininni.

Niðurstaðan skýr

Þá segja þau Þórarinn og Þórdís að í kjölfar skýrslu/úttektar frá Læknafélagi Íslands haustið 2021 hafi komið ákall frá stjórnvöldum um að fjölga læknanemum verulega.

„Í skýrslunni kom fram að læknamönnun á Íslandi væri mjög ábótavant og að ráðast þyrfti í átak og mennta fleiri lækna. Læknadeild fór strax í mikla greiningarvinnu og kortlagði hvað þyrfti að koma til ef fjölga ætti nemum í 75 og svo í framhaldinu í 90. Niðurstaðan var skýr; það þyrfti að koma til nýráðninga á kennurum og innviðir þyrftu að stórbatna.“

Glíma við aðstöðuleysi og skort á fjármagni

Þegar þau eru spurð að því hvort læknadeild stefni á frekari fjölgun læknanema á komandi árum, segja þau:

„Í stuttu máli er það fyrst og fremst aðstöðuleysið og skortur á fjármagni til að ráða nýja kennara sem hindrar það. Við sendum minnisblað til Háskóla, vísinda og nýsköpunarráðuneytisins (HVIN) með útreikningum varðandi það fjármagn sem þyrfti til þessarar fjölgunar. Á deildarfundi Læknadeildar haustið 2023 var samþykkt að fjölga úr 60 í 75. Fjármagnið sem var veitt til þessarar fjölgunar náði fyrst og fremst til ráðningar nýrra kennara, aðstöðuleysið er enn vandamál.“

• Blogga um frétt