Innlent | mbl | 10.3.2025 | 15:05

Tillagan meira í takti við sjónarmið lífeyrissjóða

Bjarni hafði lagt til slit ÍL-sjóðs en nú er lagt til að greiða kröfuhöfum yfir 650 milljarða króna með útgáfu skuldabréfa og með öðrum leiðum. Samsett mynd

Framkvæmdastjóri Gildis segir að tillaga ÍL-sjóðs og fjármála- og efnahagsráðuneytisins endurspegli „sterka“ stöðu skuldabréfaeigenda í málinu. Tillagan sé enn fremur meira í takti við sjónarmið lífeyrissjóða heldur en það sem Bjarni Benediktsson, fyrrverandi fjármála- og efnahagsráðherra, hafði lagt upp með.

„Við vorum allir sjóðirnir að fá í morgun fyrstu tillögu sem kemur frá ráðgjöfunum. Þannig að við eigum eftir að leggja mat á þá tillögu sem er fram komin,“ segir Davíð Rúdólfsson, framkvæmdastjóri Gildis í samtali við mbl.is.

Frétt af mbl.is

650 milljarðar til að gera upp skuldir ÍL-sjóðs

ÍL-sjóður og ráðuneytið sendu frá sér tilkynningu í morgun þar sem lagt er til að ÍL-sjóður og ríkið afhendi kröfuhöfum sínum skuldabréf upp á 540,4 milljarða króna.

Kröfuhafarnir fengju einnig önnur verðbréf að verðmæti 38 milljarða króna, reiðufé í gjaldeyri að verðmæti 55 milljarða króna og 18 milljarða í íslenskum krónum.

Upphæðin myndi því nema samtals 651,4 milljörðum ef kröfuhafarnir (lífeyrissjóðir) samþykkja tillöguna.

Tillagan er lögð fram eftir vinnu 18 ráðgjafa lífeyrissjóða og viðræðunefnd fjármálaráðherra.

Frétt af mbl.is

Slit ÍL-sjóðs í bígerð

„Ekki útgangspunkturinn í þessari tillögugerð“

Bjarni Benediktsson hafði sem fjármálaráðherra lagt fram áformaskjal um framlagningu lagafrumvarps á Alþingi sem hefði heimilað slit og uppgjör ÍL-sjóðs. Lífeyrissjóðirnir tóku ekki vel í þá tillögu en Bjarni sagði markmiðið vera að draga úr tjóni skattgreiðenda og komandi kynslóða um leið og skuldbindingar ríkissjóðs væru virtar.

Spurður hvort að, út frá hans sjónarhóli, þessi tillaga sé betri en það sem Bjarni Benediktsson hafði lagt áherslu á segir Davíð:

„Já, ég held að það sé alveg óhætt að segja að uppleggið sem slíkt er klárlega miklu meira í takti við þau sjónarmið sem lífeyrissjóðirnir höfðu varðandi stöðu mála í upphafi. Og endurspeglar þá sterku stöðu sjóðirnir hafa allan tímann haldið fram að skuldabréfaeigendur hefðu í þessu máli. Að sama skapi er tiltölulega augljóst að útgangspunkturinn sem lagt var af stað með af hálfu fjármálaráðuneytisins [undir stjórn Bjarna], hann er ekki útgangspunkturinn í þessari tillögugerð,“ segir Davíð.

Tillaga sem þarf að rýna vel

ÍL-sjóður varð til við uppskiptingu Íbúðalánasjóðs og var stofnaður með lögum sem tóku gildi 31. desember 2019. Var hann stofnaður með það að markmiði að lágmarka áhættu ríkissjóðs í tengslum við úrvinnslu og uppgjör á uppsöfnuðum fjárhagsvanda Íbúðalánasjóðs.

Tillögurnar verða lagðar fyrir fund skuldabréfaeigenda til samþykktar, en samþykki 75% kröfuhafa þarf til. Davíð segir að reiknað sé með fundi 10. apríl.

„Þetta er stórt mál, háar fjárhæðir og að einhverju leyti tillaga sem þarf að rýna vel. Það mun örugglega taka sjóðina einhverja daga að mynda sér afstöðu,“ segir Davíð.

Verði tillögurnar samþykktar mun fjármála- og efnahagsráðherra í framhaldi sækja heimild til Alþingis til að ljúka uppgjörinu með frumvarpi til fjáraukalaga.