Slógust inni í bílnum og tjónuðu annan

Ökumaður og farþegi bíls slógust inni í bílnum í dag með þeim afleiðingum að bíllinn hafnaði á öðrum bíl og olli tjóni.

Atvikið átti sér stað í miðborg Reykjavíkur og er meðal þess sem kemur fram í dagbók lögreglu vegna verkefna hennar frá fimm í morgun til fimm síðdegis.

Bæði ökumaður og farþegi voru handteknir og annar vistaður í fangageymslu.

Var lögreglu einnig tilkynnt um líkamsárás og þjófnað á skemmtistað í miðborginni en gerandinn var farinn þegar lögregla kom á vettvang. Málið er til rannsóknar.

Nytjastuldur og eldur í rusli

Lögreglu var tilkynnt um nytjastuld á bifreiðinni OYM-80 í dag, rauðri Volkswagen golf bifreið.

Skráningarmerki voru þá tekin af 20 bifreiðum í dag, ýmist vegna vanrækslu á tryggingum, aðalskoðun eða endurskoðun.

Eldur kviknaði í rusli upp við hús í miðborginni en eldurinn hafði læst sig í gluggakarma. Slökkvilið kom á vettvang og slökkti eldinn en minniháttar skemmdir urðu.

Auk þess hafði lögregla afskipti af nokkrum ökumönnum vegna réttindaleysis eða aksturs undir áhrifum eða fyrir að tala í símann undir stýri án handfrjáls búnaðar.

• Blogga um frétt