Innlent | mbl | 13.3.2025 | 14:51

Guðmundur, Sóley og Styrkár skipa starfshópinn

Í starfshópnum sitja Guðmundur Valur Guðmundsson, framkvæmdastjóri hjá Vegagerðinni, Sóley Ragnarsdóttir fyrir innviðaráðuneytið og Styrkár Jafet Hendriksson fyrir fjármála- og efnahagsráðuneytið. Ljósmynd/Stjórnarráðið

Starfshópur um fjármögnun Sundabrautar hefur tekið til starfa en hann hefur það hlutverk að vera verkefnisstjórn Sundabrautar til ráðgjafar t.a.m. varðandi undirbúning viðskiptaáætlunar, fjármögnunar og útboðsferlis.

Sundabraut er eitt þeirra verkefna sem tiltekið er í lögum um samvinnuverkefni um samgönguverkefni um að megi vinna sem samvinnuverkefni milli hins opinbera og einkaaðila og verði fjármögnuð með gjaldtöku af umferð í takt við lög um samvinnuverkefni. Áætlanir gera ráð fyrir því að Sundabraut opni árið 2031 og þá verður heimilt að innheimta veggjöld, að því er segir í tilkynningu á vef Stjórnarráðsins.

Í hópnum sitja Guðmundur Valur Guðmundsson, framkvæmdastjóri hjá Vegagerðinni, Sóley Ragnarsdóttir fyrir innviðaráðuneytið og Styrkár Jafet Hendriksson fyrir fjármála- og efnahagsráðuneytið. Fyrsti fundur hópsins var haldinn í vikunni.

Ákvörðun um leiðaval liggi fyrir um mitt ár

„Unnið hefur verið að undirbúning Sundabrautar um langt skeið. Sérstök verkefnastjórn tók til starfa árið 2022 til að hafa umsjón með og fylgja eftir undirbúningi Sundabrautarverkefnisins og frá þeim tíma hefur verið unnið að ýmsum hliðum málsins. Gert er ráð fyrir að umhverfismatskýrsla verði tilbúin í vor og að ákvörðun um leiðaval liggi fyrir um mitt ár.

Þegar ákvörðun um leiðarval liggur fyrir og hún auglýst sem breyting á aðalskipulagi er unnt að hefja útborðsferli samvinnuverkefnisins. Verkefnið verður langstærsta einstaka verkefnið í samgöngukerfi landsins en miðað við fyrirliggjandi kostnaðaráætlanir má gera ráð fyrir að árleg fjárfesting vegna verkefnisins geti numið á bilinu 20-25 ma.kr. Til samanburðar nema heildarframlög til framkvæmda og viðhalds á vegum um 27 ma.kr á fjárlögum fyrir árið 2025,“ segir í tilkynningunni.

Þá er farið yfir helstu áfanga í Sundabrautarverkefninu.

Mars 2025 – Vinnuhópur um fjármögnun Sundabrautar tekur til starfa
2024 – Unnið að ýmsum verkefnum, þ.á m. jarðtæknirannsóknum á landi og sjó, umhverfismatsskýrslu, kostnaðarmati, útfærslu valkosta á legu Sundabrautar og gerð viðskiptaáætlunar.
2023 - Matsáætlun vegna mats á umhverfisáhrifum. Verkefnastjóri ráðinn til að stýra verkefnum tengdum Sundabraut.
2022 – Verkefnastjórn skipuð til að hafa umsjón með og fylgja eftir undirbúningi Sundabrautar, skipuð fulltrúum innviðaráðuneytis, Vegagerðarinnar, Reykjavíkurborgar og Sambands íslenskra sveitarfélaga.
oFélagshagfræðileg greining á lagningu Sundabrautar leiðir í ljós mikinn þjóðhagslegan ábata fyrir samfélag með minni akstri, útblæstri og mengun og styttri ferðatíma vegfarenda vegna styttri leiða til og frá höfuðborgarsvæðinu. Heildarakstur á höfuðborgarsvæðinu gæti minnkað um 150 þús. km á hverjum sólarhring.
2021 – Ríki og borg undirrita yfirlýsingu um lagningu Sundabrautar þar sem sammælst var um Sundabraut yrði lögð alla leið í Kjalarnes í einni framkvæmd og að brautin yrði tekin í notkun árið 2031.
oStarfshópur um lagningu Sundabrautar, með fulltrúum Vegagerðarinnar, Reykjavíkurborgar, Faxaflóahafna og Samtaka sveitarfélaga á höfuðborgarsvæðinu, kynnti niðurstöður fyrsta áfanga.
2020 – Alþingi samþykkti lög um samvinnuverkefni um samgönguframkvæmdir en Sundabraut er ein sex framkvæmda sem heimilt er að bjóða út sem samvinnuverkefni (PPP).