Hins vegar geri hún engar athugasemdir við þá stefnu sem mótuð er á vettvangi ríkisstjórnarinnar eða þau fjárframlög sem rétt kjörið Alþingi hefur ákveðið að renni til varna Úkraínu, en þar á meðal eru ýmis hernaðargögn, vopn og verjur.

Morgunblaðið leitaði eftir svörum hjá forsetaembættinu í framhaldi af fregnum um að Ísland hefði þegar veitt tæpum sex milljörðum króna í hernaðaraðstoð við Úkraínu. Sennilegt er talið að sá stuðningur frá Íslandi, líkt og öðrum Evrópuríkjum, aukist frekar en hitt á komandi árum, fari svo að Bandaríkin dragi varanlega úr þeirri aðstoð.

Í aðdraganda forsetakjörs á liðnu ári vék Halla að stuðningi Íslands við Úkraínuher í vörn hans gegn innrás Rússa og taldi hann mjög varhugaverðan. Hið herlausa og friðsæla Ísland ætti ekki að veita neinum fjármunum til vopnakaupa af nokkru tagi. Aðrir helstu frambjóðendur voru á öðru máli og minntu á að Ísland væri ekki hlutlaust ríki.

Svar Höllu Tómasdóttur, forseta Íslands, við spurningu blaðsins var í heild sinni svo:

„Forseti áréttar að Ísland er friðsæl og herlaus þjóð sem getur haft jákvæð áhrif á umheiminn með því að vera það áfram. Ísland hefur áður verið vettvangur friðarumleitana í heiminum. Hingað eru þau sem vilja vinna að friði og réttlátum leikreglum velkomin. Forseti og ráðherrar funda reglulega og ræða bæði innanríkis- og utanríkismál. Ráðherrum er kunnug sýn forseta og forseti er upplýstur um viðbótarframlag til varnartengds stuðnings við Úkraínu, sem tengist loforði fyrri ríkisstjórnar. Forseti setur sig ekki á móti stefnu lýðræðislega kjörins Alþingis og ríkisstjórnar. Hún mun hér eftir sem hingað til tala fyrir friði og mannúð og öðrum grunngildum þjóðarinnar, bæði innan lands og utan.“

Tengdar fréttir

Varnarmál Íslands

Segir að stóru málin vanti

• Koma mikilvægum kerfum í samband
• Eftirlit í forgrunni hjá íslenskum her
• Landsmenn fái senda bæklinga
• Sérstakt varnarmálaráðuneyti ekki í bígerð

» Fleiri tengdar fréttir