Ísland hefur fengið um 2,4 milljarða í styrki

Ísland hefur fengið um 2,4 milljarða kr. í styrki úr EU4Health-áætluninni og má gera ráð fyrir enn frekari styrkveitingum fyrir lok tímabilsins.

Alma D. Möller heilbrigðisráðherra hvetur stofnanir til að skoða þá möguleika sem felast í þátttöku í heilbrigðisáætlun Evrópusambandsins því ávinningurinn sé mikill.

Þetta kemur fram á vef heilbrigðisráðuneytisins. 

Þar segir að EU4Health sé áætlun Evrópusambandsins (ESB) á sviði heilbrigðismála sem hafi það markmið að styðja við nýjungar á sviði heilbrigðisvísinda, stuðla að umbótum og bættu öryggi heilbrigðisþjónustu, bæta heilsu, fyrirbyggja sjúkdóma og vernda borgara fyrir heilsufarsógnum þvert á landamæri.

Umfangið hefur aldrei verið meira

„Núgildandi áætlun ESB sem er fyrir tímabilið 2021-2027 er með fjárhagsáætlun upp á 5,3 milljarða evra til styrkveitinga og hefur umfangið aldrei verið meira,“ segir ráðuneytið.

Þá kemur fram að þátttaka Íslands í EU4Health hafi farið vaxandi og til landsins hafi verið úthlutað ríkulegum styrkjum til skilgreindra verkefna hérlendis og fyrir þátttöku í samstarfsverkefnum með öðrum Evrópulöndum.

Fjórar stórar styrkupphæðir

„Embætti landlæknis hefur fengið úthlutaðar fjórar stórar styrkupphæðir til sértækra verkefna að upphæð nálagt 1,2 milljörðum íslenskra króna. Þessi verkefni snúa fyrst og fremst að hugbúnaðar- og upplýsingatækni og til að efla notkun stafrænna leiða til hagsbóta í heilbrigðismálum, s.s. greiða leiðir til að deila heilbrigðisupplýsingum á öruggan, skilvirkan og samhæfðan hátt innan og á milli landa. Þá hafa fjölmargar stofnanir heilbrigðismála gert samning um þátttöku í samstarfsverkefnum Evrópulanda sem eru styrkt fjárhagslega, og má þar nefna Lyfjastofnun, Heilsugæslu höfuðborgarsvæðisins, embætti landlæknis, Landspítalann og Reykjalund,“ segir í tilkynningunni.

Ekki ólíklegt að fleiri styrkir bætist við

Enn fremur segir að nú þegar sé áætlað að heildarupphæð fjárstyrkja til Íslands úr EU4Health-áætluninni nemi um það bil 16,3 milljónum evra, eða um 2,4 milljörðum íslenskra króna, sem fyrr segir.

„Þær upplýsingar byggja á samningum sem gerðir hafa verið fram til þessa um fjárstyrki fyrir skilgreind verkefni hérlendis og þátttöku í samstarfsverkefnum með fleiri Evrópulöndum. Fjárstyrkir eru greiddir samkvæmt framvindu verkefna á tímabili verkefna innan áætlunarinnar 2021-2027. Ekki er ólíklegt að fleiri styrkir bætist við á komandi 2-3 síðustu árum áætlunarinnar.“

• Blogga um frétt