Jóninna 105 ára og heilsan er enn góð

„Heilsan er góð og minnið einstakt,“ segir Leifur Franzson um móður sína Jóninnu Margréti Pálsdóttur, sem fædd er 17. mars 1920 og varð 105 ára í gær. Hún er næstelsti Íslendingurinn. Eldri henni er Þórhildur Magnúsdóttir, sem varð 107 ára í desember.

Fram á síðustu misseri hélt Jóninna eigið heimili í Granaskjóli í Reykjavík, en hjartað slær í Stykkishólmi, þar sem hún er uppalin. Hún býr nú á dvalarheimili Hrafnistu við Sléttuveg. Stór hópur afkomenda heilsaði upp á Jóninnu um helgina.

Jóninna er dóttir Páls V. Bjarnasonar sýslumanns í Stykkishólmi og Margrétar Árnadóttur konu hans. Hún náði 101 árs aldri og Hildur Solveig, systir Jóninnu, varð 103 ára. Það er sem sagt langlífi í ættinni.

Eiginmaður Jóninnu var Franz E. Pálsson. Fjórir synir Jóninnu og Franz eru Páll tollvörður, Hjalti jarðfræðingur, Leifur lyfjafræðingur og yngstur er Bogi, skógfræðingur og kennari.