Ekki sjálfsagt að Ísland verði undanskilið

Fulltrúar Samtaka atvinnulífsins (SA) hafa síðustu daga átt fundi með fulltrúum framkvæmdastjóra viðskipta- og efnahagsöryggis í framkvæmdastjórn Evrópusambandsins (ESB) til að undirstrika mikilvægi þess að Ísland verði undanskilið í verndaraðgerðum ESB gagnvart Bandaríkjunum.

„Alþjóðaviðskipti eru lífæð Íslands,“ segir Sigríður Margrét Oddsdóttir, framkvæmdastjóri Samtaka atvinnulífsins, en hún er ein þeirra sem eru stödd í Brussel fyrir hönd SA.

Hefur einnig verið fundað með sendiherra Íslands í Brussel og starfsmönnum í sendiráðinu auk viðskiptafulltrúa hjá fastanefndum nokkurra norðurlanda. 

Í samtali við mbl.is segir Sigríður að fulltrúar Íslands hafi mætt miklum skilningi og áheyrn af hálfu forsvarsmanna ESB, hins vegar hafi ekki verið hægt að lofa því að Ísland verði undanskilið í mögulegum verndaraðgerðum gagnvart Bandaríkjunum. 

Hvorki staðfest né sjálfsagt

Líkt og kunnugt er þá hefur Donald Trump Bandaríkjaforseti sett á tolla á allt innflutt ál og stál til Bandaríkjanna og er búist við að hann muni tilkynna um frekari tollaaðgerðir í byrjun apríl. 

„Þessar aðgerðir kalla á mótvægisaðgerðir af hálfu ESB og hefur sambandið þegar tilkynnt um gagnkvæma tolla sem beinast gegn Bandaríkjunum. Við eigum allt eins von á því að það verði gripið til verndarráðstafanna og þá er svo mikilvægt að Ísland sé undanskilið þeim aðgerðum, en það er hvorki staðfest né sjálfsagt,“ segir Sigríður. 

Sigríður er ein þeirra sem hafa setið fundina í Brussel. Ljósmynd/Aðsend

Segir hún að fundirnir í Brussel hafi fyrst og fremst gengið út á það að afla frekari upplýsinga og fá frekari innsýn inn í þá stöðu sem er uppi. Sigríður segir að helstu rök fulltrúa SA fyrir því að Ísland verði undanskilið téðum verndarráðstöfunum sé að með aðild Íslands að evrópska efnahagssvæðinu og innri markaðnum sé Ísland mikilvægur samstarfsaðili. 

Nefnir hún til dæmis hve Evrópuvæddur íslenskur vinnumarkaður er en 24% þeirra sem starfa á íslenskum vinnumarkaði eru erlendir ríkisborgarar og af þeim eru 80% frá evrópska efnahagssvæðinu. 

„Það er líka þannig að íslensk álframleiðsla er ein sú grænasta í heiminum og við erum að sjá Evrópu fyrir um fjórðungi af áli. Svo er það líka íslenskur sjávarútvegur sem er alveg gríðarlega mikilvægur fyrir Evrópumarkað,“ segir Sigríður. 

Spennandi að fylgjast með á næstu vikum

„Skilaboðin til okkar á þessum fundum eru fyrst og fremst þau að aðgerðir ESB séu svar við aðgerðum Bandaríkjanna [...]. Við mætum mjög miklum skilningi og það hefur verið mikill stígandi í hagsmunagæslunni af hálfu Íslands og skilaboðin eru komin mjög skýrt á framfæri. Það hefur hins vegar ekki verið gefið út hvort Ísland verði undanþegið ef ESB mun grípa til þessara verndaraðgerða.“

Segir Sigríður að afar áhugavert verði að fylgjast með því hvernig næstu vikur munu þróast og hvaða ákvarðanir verða tilkynntar í byrjun apríl af hálfu Bandaríkjanna og þá hvernig ESB muni svara. 

• Blogga um frétt