Hæstiréttur hefur þyngt dóm yfir karlmanni sem var dæmdur í þriggja og hálfs árs fangelsi fyrir kynferðisbrot gegn fyrrverandi stjúpdóttur sinni í fyrra. Hæstiréttur staðfestir dóminn en dæmdi manninn í fimm ára fangelsi. 

Maðurinn var ákærður fyrir kynferðisbrot gegn barni, dóttur þáverandi sambýliskonu sinnar, og stórfellt brot í nánu sambandi á árunum 2016 til 2019. Fram kom í ákæru að hann hefði mis­notað frek­lega yf­ir­burðastöðu sína gagn­vart stúlkunni, traust henn­ar og trúnað sem stjúp­faðir og á al­var­leg­an hátt ógnað heilsu og vel­ferð henn­ar með því að hafa í ótil­greind­an fjölda skipta með ólög­mætri nauðung haft við hana önn­ur kyn­ferðismök en sam­ræði auk þess að sýna henni klám­mynd­ir og taka mynd af kyn­fær­um henn­ar. 

Frétt af mbl.is

Braut ítrekað á barnungri dóttur sambýliskonunnar

Sýknaður í héraði en sakfelldur í Landsrétti

Með dómi héraðsdóms var maðurinn sýknaður af þeim brotum sem honum voru gefin að sök en með dómi Landsréttar var hann sakfelldur og dæmdur í fangelsi í þrjú ár og sex mánuði.

Maðurinn áfrýjaði niðurstöðunni til Hæstaréttar sem samþykkti að taka málið til meðferðar.

Frétt af mbl.is

Samþykkir beiðni um áfrýjun í kynferðisbrotamáli

Hæstiréttur sammála niðurstöðu Landsréttar

Hæstiréttur telur niðurstöðu hins áfrýjaða dóms hafa byggt á heildstæðu mati á sönnunargögnum málsins, þar á meðal rökstuddu mati á trúverðugleika mannsins og stúlkunnar. Tekið er fram að ekkert hafi komið fram um ágalla á þeirri aðferð sem beitt hafði verið við mat á sönnun á háttsemi mannsins sem hann var sakfelldur fyrir með hinum áfrýjaða dómi.

Þá var ekki fallist á röksemdir hans um að sönnunarbyrði um sekt hans hefði verið aflétt af ákæruvaldinu í andstöðu við 108. gr. laga um meðferð sakamála svo og 2. mgr. 70. gr. stjórnarskrárinnar og 2. mgr. 6. gr. mannréttindasáttmála Evrópu.

„Ákærði var með hinum áfrýjaða dómi sakfelldur fyrir nauðgun og önnur kynferðisbrot gegn brotaþola, stórfellt brot í nánu sambandi auk þess að hafa sýnt henni klámmyndir og tekið mynd af kynfærum hennar, svo sem nánar er rakið í ákæru. Þessi niðurstaða, sem reist var á mati á sönnunargildi munnlegs framburðar fyrir dómi, verður sem fyrr greinir ekki endurskoðuð fyrir Hæstarétti, sbr. 5. mgr. 215. gr. laga nr. 88/2008. Að því gættu og að öðru leyti með vísan til forsendna hins áfrýjaða dóms verður staðfest niðurstaða hans um sakfellingu ákærða fyrir þá háttsemi sem honum er gefin að sök,“ segir í niðurstöðu Hæstaréttar. 

Manninum var einnig gert að greiða allan áfrýjunarkostnað málsins fyrir Hæstarétti samtals 1.326.411 krónur, þar með talin málsvarnarlaun verjanda síns, 1.004.400 krónur, svo og þóknun réttargæslumanns brotaþola, 124.000 krónur.

Tengdar fréttir

Kynferðisbrot

Opnaði sig á þingi sem þolandi kynferðisofbeldis

• Það versta sem kona gat gert var að vera þrjósk
• Töf á málsmeðferð metin nauðgara til málsbóta
• Sýknaður í héraði en sakfelldur í Landsrétti
• Misnotaði sér ítrekað yfirburðastöðu sína

» Fleiri tengdar fréttir

• Blogga um frétt