Þrumur og eldingar við Reykjanesskaga

Þrumuveður gengur nú yfir og í kringum Reykjanesskaga en hátt í 30 eldingar hafa mælst frá því rétt fyrir klukkan hálffjögur í dag með tilheyrandi þrumum.

Þorsteinn V. Jónsson, veðurfræðingur á Veðurstofu Íslands, segir í samtali við mbl.is að niðursláttur eldinga hafi mælst suður og suðvestur af Reykjanesskaga.

Frétt af mbl.is

Veðurstofan varar landsmenn við eldingaveðri

„Það er talsvert af eldingum núna og þetta gæti staðið eitthvað fram á kvöld og svo dregur úr þessu,“ segir Þorsteinn en þrumuveðrið fylgir skilum sem voru að fara yfir suðvestanvert landið.

„Það kom óstöðugt loft í kjölfarið og því fylgdu þrumur og eldingar.“

Heyra má á þessu stutta myndskeiði sem tekið er upp á völlunum í Hafnarfirði hversu mikil orka fylgir þrumunum.

Suðvestanstormur

Djúp og kröpp lægð kemur nú upp að landinu og færist yfir vesturhluta landsins í kvöld og nótt að sögn Þorsteins. Lægðin verður þá komin yfir Vestfirðina í nótt og þá snýst í allhvassa eða hvassa suðvestanátt og jafnvel má búast við stormi sums staðar.

Gular viðvaranir taka gildi í nótt fyrir Vestfirði, Strandir, Norðurland vestra og Norðurland eystra. Þær verða í gildi fram yfir hádegi á morgun. 

Frétt af mbl.is

„Ljósið lifir“

• Blogga um frétt