Gæti útskýrt óþefinn og óbragðið

Borun nýrrar neysluvatnsborholu við Hveragerði gæti skýrt þann óþef og óbragð sem Hvergerðingar hafa fundið af vatninu undanfarna daga. 

Í tilkynningu á vef bæjarins segir að borunin hafi hugsanlega komið hreyfingu á jarðveg sem orsakaði skert gæði neysluvatnsins. Niðurstöður úr sýnatökum sem bárust fyrir helgi benda til að lyktar- og bragðgallar vatnsins séu vegna mengunar úr jarðvegi.

Heilbrigðiseftirlit Suðurlands segir að vatnið sé ekki talið heilsuspillandi þrátt fyrir að gæði þess séu ekki viðunandi.

Frétt af mbl.is

Lykt staðfest af neysluvatni og lækkað ph-gildi

Vel vaktað

Útskolun á kerfinu gæti tekið tíma og er íbúum bent á að neyta vatns í flöskum á meðan ástandið varir ef þeim líkar ekki vatnið í krananum.

„Ástand neysluvatnsins í Hveragerði er vel vaktað og regluleg sýni eru og verða áfram tekin og rannsökuð. Áfram er unnið að því að greina hvað orsakar bragð- og lyktargalla í neysluvatninu með margs konar prófunum, athugunum og útskolun úr vatnsveitukerfi bæjarins. Sú vinna er í forgangi hjá bænum,“ segir í tilkynningu bæjarins.

• Blogga um frétt