Kynna aðgerðir sem varða um 65.000 manns

Félags- og húsnæðismálaráðuneytið segir að í fjármálaáætlun fyrir árin 2026-2030 séu stór tíðindi fyrir öryrkja og eldra fólk.

Bent er á að tvær umfangsmiklar breytingar verði fjármagnaðar með áætluninni, auk kerfisbreytinga sem nýtt örorkulífeyriskerfi felur í sér.

„Áætlunin markar vatnaskil fyrir öryrkja og aldraða á Íslandi. Við sýnum hér að sú hugsjón að taka betur utan um fólkið okkar er sannarlega komin til framkvæmda,“ er haft eftir Ingu Sæland, félags- og húsnæðismálaráðherra, í tilkynningunni. 

Breytingar taka mið af hækkun launavísitölu

Þá segir að í stefnuyfirlýsingu ríkisstjórnarinnar sé kveðið á um að árlegar breytingar á örorku- og ellilífeyrisgreiðslum taki framvegis mið af hækkun launavísitölu og verði aldrei minni en sú hækkun sem verður á verðlagi.

Þetta sé til að stuðla að því að greiðslurnar fylgi betur almennri kjaraþróun á vinnumarkaði og tryggja að lífeyrisþegar dragist ekki aftur úr í kaupmætti. Tekið er fram að aðgerðin sé nú fjármögnuð í fjármálaáætlun.

Mynd/Stjórnarráðið

Kjaragliðnun úr sögunni

Bent er á að breytingin snerti alla sem fái greiðslur frá almannatryggingum á Íslandi, þ.e. alla sem fái örorkulífeyri, ellilífeyri eða endurhæfingarlífeyri. Það séu um 65.000 manns.

„Þetta er risastórt mál og stórkostlegt að sjá það verða að veruleika. Kjaragliðnun almannatrygginga og launa verður með þessu loksins úr sögunni og fólk um land allt nýtur góðs af,“ er jafnframt haft eftir Ingu.

Þá kemur fram að í fjármálaáætlun sé gert ráð fyrir að almennt frítekjumark ellilífeyrisþega hækki í þrepum úr 36.500 kr. og upp í 60.000 kr. á mánuði. Aðgerðin sé einnig samkvæmt stefnuyfirlýsingu ríkisstjórnarinnar.

Mynd/Stjórnarráðið

95% lífeyrisþega fái hærri greiðslur

„Í dag má ellilífeyrisþegi hafa 438.000 kr. í tekjur á ári án þess að ellilífeyrisgreiðslur hans byrji að lækka. Þegar breytingarnar verða að fullu komnar til framkvæmda mun viðkomandi hins vegar geta haft 720.000 kr. í tekjur á ári án þess að greiðslurnar lækki. Munurinn þarna á milli er 282.000 kr. Engu skiptir hvaðan tekjurnar koma og hvort þær eru til dæmis fjármagnstekjur, tekjur frá lífeyrissjóðum eða atvinnutekjur,“ segir í tilkynningunni.

Loks segir að við gildistöku í haust verði greiðslukerfið einfaldað og greiðslur hækkaðar. Segir að 95% lífeyrisþega muni fá hærri greiðslur í nýju kerfi.

„Þá eru í nýja kerfinu hvatar til atvinnuþátttöku og samvinna verður aukin í endurhæfingu. Greiðslur verða samfelldar og samhæfingarteymi hafa yfirsýn yfir mál einstaklinga sem þurfa þjónustu fleiri en eins kerfis,“ segir jafnframt í tilkynningunni.

Mynd/Stjórnarráðið

• Blogga um frétt