Innlent | mbl | 1.4.2025 | 18:00 | Uppfært 19:09

Gos gæti brotist út nær Vogum og Reykjanesbraut

Kortið sýnir staðsetningu jarðskjálfta í dag og staðsetningu þekktra sprungna á svæðinu. Þar sést að meginsprungustefna á svæðinu er í norðaustur/suðvestur. Kort/Veðurstofa Íslands

Jarðskjálftavirkni heldur áfram þó dregið hafi úr eldgosinu norðan við Grindavík og að lítið sjáist til virkni. Skjálftavirknin færist norður og Veðurstofan gerir ráð fyrir kvika geti komið upp þar.

Skjálftavirkni við suðurhluta kvikugangsins, nærri Grindavík, hefur dvínað en virknin á norðurenda kvikugangsins, nær Reykjanesbrautinni, heldur áfram af svipuðum krafti og hefur færst enn norðar síðustu klukkustundir.

„Á meðan jarðskjálftavirkni er enn töluverð og aflögun mælist ennþá þarf að gera ráð fyrir þeim möguleika að kvika komist aftur upp á yfirborðið á Sundhnúkagígaröðinni eða nærri því svæði sem skjálftavirkni er mest,“ segir í færslu á vef Veðurstofunnar.

Frétt af mbl.is

Ekkert lát á skjálftavirkni við Reykjanesbraut

Horft til norðurs yfir Grindavík og í átt að gosinu, úr flugi með þyrlu Norðurflugs. Enn norðar hefur kvikugangurinn teygt sig í átt að Reykjanesbraut. mbl.is/Árni Sæberg

Finnast greinilega í Vogum

Skjálftavirknin er komin tæpa níu kílómetra norðar en nyrsta gossprungan í þessari goshrinu, en hún myndaðist í ágúst 2024. Stærstu skjálftarnir hafa verið um 3 að stærð og finnast greinilega í Vogum sem er um sjö kílómetra norðvestur við virknina.

Veðurstofan segir aflögunarmælingar sýna að kvika flæði enn frá Svartsengi yfir í kvikuganginn á Sundhnúksgígaröðinni. Jarðskjálftavirknin bendi til þess að kvikan færist til norðausturs.

Skjálftavirknin er á um 4-6 km dýpi og unnið er að því að greina aflögunargögn á því svæði.