Viðkvæmum persónuupplýsingum ljósmæðra dreift

Sjúkratryggingar Íslands hafa sent út reikninga til kvenna sem þegið hafa þegið heimaþjónustu ljósmæðra og þjónustu ljósmæðra við heimafæðingar. Reikningarnir innihalda viðkvæmar persónuupplýsingar um ljósmæðurnar, eins og launaupplýsingar og kennitölur.

Unnur Berglind Friðriksdóttir, formaður Ljósmæðrafélags Íslands, segir málið mjög alvarlegt. Með þessu hafi ljósmæður verið berskjaldaðar fyrir sínum skjólstæðingum.

Konur eiga almennt ekki að greiða fyrir heimaþjónustu eða heimafæðingar og hafa reikningarnir því verið sendir fyrir mistök, en þeir birtust inni á vefsvæði Ísland.is í gær. Unnur áréttar að konur eigi ekki að greiða reikningana.

Fengu reikninga sem ljósmæður sendu

„Þetta eru ekki reikningar sem konur eiga að fá en okkur finnst líka alvarlegt að Sjúkratryggingar séu að deila svona persónuupplýsingum um ljósmæður,“ segir Unnur í samtali við mbl.is.

„Þegar þú ferð á stofu til læknis þá færðu ekki kennitöluna hjá lækninum og upplýsingar um hvað hann er með í laun,“ bætir hún við og bendir á að ljósmæður sinni mjög mismunandi skjólstæðingahópi.

Málið uppgötvaðist í gær þegar ljósmæður fóru að fá símtöl frá mæðrum sem þær hafa sinnt með fyrirspurn um hvort þær ættu að greiða fyrir þjónustuna.

Konurnar fengu reikninga sem ljósmæðurnar sjálfar senda Sjúkratryggingum fyrir þjónustunni, með öllum þeim persónuupplýsingum sem þurfa að fylgja frá þeim.

„Skaðinn er skeður“

Unnur veit ekki hvað margar konur fengu senda reikninga en hún gerir ráð fyrir því að allar mæður sem hafa fengið þjónustu ljósmæðra síðasta mánuðinn hafi fengið slíkan reikning.

„Það eina sem við vitum eru upplýsingar frá konum sem hafa haft samband við ljósmæður til að spyrja hvort þær eigi að borga þetta. Þannig fréttum við af þessu. Ef þær hefðu ekki gert það þá hefðum við ekki haft hugmynd um að það væri verið að dreifa þessum persónuupplýsingum,“ segir Unnur og ítrekar að málið sé mjög alvarlegt.

Hún hafi reynt að ná sambandi við Sjúkratryggingar í allan morgun, en það hafi gengið illa. Loks hafi hún náð í starfsmann sem ætlaði að kanna málið, en á meðan hanga reikningarnir inni.

„Skaðinn er skeður en ég vona að sjúkratryggingar sjái sóma sinn í því að kippa þessu út sem fyrst og þetta má ekki gerast aftur.“

• Blogga um frétt