Snorri sennilega með svæsið bráðaofnæmi
Setja bókamerki
Í nýjasta þætti Spursmála var farið yfir það helsta sem var um að vera á samfélagsmiðlum ráðamanna þjóðarinnar í vikunni sem nú er að líða undir lok. Yfirferðina má sjá í meðfylgjandi myndskeiði en henni verður einnig gerð skil hér að neðan.
Það gekk ýmislegt á. Ekki bara hjá stjórnmálafólkinu okkar heldur líka hjá veðurguðunum sem eru augljóslega að glíma við geðhvörf; Rigning, rok, haglél, sól, jólasnjór, skin, skúrir, þrumur og eldingar - þvílíkar geðsveiflur. Í ofanálag var líka einhver derringur í móður jörð í vikunni sem endaði með eldgosi númer 650 þúsund á Reykjanesinu. Eða hver er svo sem að telja?
En sumir vilja meina að jörð hafi skolfið og eldingum lostið niður vegna einhvers uppnáms í Hádegismóum sem reyndar fór fram hjá öllum nema kannski blaðamönnum DV.
Þingfundi frestað
Sama hvað orsakaði jarðhræringarnar á Reykjanestá, hvort sem það var uppþotið á milli Drésa Magg og Kollu Bergþórs eða grútleiðinleg ræða Karls Gauta á Alþingi, þá fóru þær ekki fram hjá Hildi Sverrisdóttur sem sat í varaforsetastól Alþingis þegar jörð fór að skjálfa. Brást hún snaggaralega við með því að fresta þingfundi á meðan skjálftinn reið yfir.
K-Frost og dísæta makkarónukakan
Kristrún Frosta var á faraldsfæti í vikunni og fékk höfðinglegar móttökur hjá sætu makkarónunni, Emmanúel Macron, forseta Frakklands. Kristrún var að vanda glæsileg til fara og þjóðinni til sóma en ef maður vissi ekki betur þá gæti þetta alveg eins verið brúðkaupsmynd sem hún deildi á Instagram. Það er einhver hjónasvipur með þeim.
Þriggja mánaða og tveggja vikna afmæli
Verkstjórnar-valkyrjurnar fögnuðu líka 100 daga ríkisstjórnar afmæli á dögunum og gátu grobbað sig af hinu og þessu - aðallega þessu. Verkstjórar, eiga þeir ekki bara að vera í bláum skóhlífum með hárnet?
Niðurtalning óþreyjufulla Eskfirðingsins
Kynjakvótakarlinn Jens Garðar getur hins vegar ekki beðið eftir að yfirstandandi kjörtímabili ljúki og er strax farinn að telja niður dagana, klukkustundirnar, mínúturnar, sekúndurnar..
Sjálfukóngurinn krýndur
Pawel okkar Bartoszek brá ekki út af vananum og smellti í eina mega kjút sjálfu þegar hann gekk um götur Gágasíu í Moldóvu. Hér með er Pawel krýndur sjálfukóngur Íslands.
Hersingin heimsótti Stubb-stjóra í Helsinki
Norðurlandaráð lagði land undir fót og skellti hersingin sér í heimsókn til Stubbs-stjóra í Helsinki. Bryndís Haralds deildi ferðasögu á Instagram og sagði að Alexander Stubb, forseti Finnlands, hafi verið frekar upptekinn af golfhringnum sem hann spilaði við Donald Trump í sömu viku. Hann hefur nú sennilega slökkt í stærri stubbum en þetta á vellinum.
Inga og Orkan í eina sæng?
Inga Sæland lætur verkin sko tala. Svo virðist vera sem hún hafi fengið grafískan hönnuð í láni frá Orkunni bensín sem aðstoðar hana við að „pinna“ þá 65000 öryrkja og ellilífeyrisþega um land allt til að tryggja þeim kjarabæturnar sem hún lofaði.
Ferfætlingafrumvarpið
Svo lagði hún líka fram ferfætlingafrumvarp sem myndi gera hunda- og kattahald leyfilegt í fjölbýli. Ókei, allt í lagi með það. En vitið þið hvað gerðist næst? Hjartaknúsarinn Hildur Sverris gróf stríðsexina sem hefur ítrekað verið beitt þarna niður frá þennan þingvetur og studdi við frumvarp Ingu sinnar. Blessuð loðbörnin, þau eru náttúrulega bara þverpólitísk.
Konur í nýsköpun
Fida Abu Libdeh kom, sá og sigraði Alþingi í vikunni með jómfrúarræðu sinni sem fjallaði um konur í nýsköpun. Alger sleggja hjá Fidu ef þú spyrð mig en Snúlli Másson miðflokksprins hefur sennilega ekki verið jafnhrifinn.
Velgjar við „woke-inu“
Honum hryllir við hugtakinu kynjajafnrétti líkt og hann fór ítarlega yfir í ræðustól Alþingis og í færslu á Facebook. Svo virðist vera sem hann sé algerlega með ofnæmi fyrir þessu. Steypist bara allur út í útbrotum og exemi þegar „woke-ið“ ber á góma. Ég veit um mjög marga sem lenda stundum í þessu, fá bara velgju og allt. Brjálæðislegt vesen, bæði líkamlega og andlega. Bataknús á Snúlla Másson.
Obba og orkublundurinn
Á meðan Snúlli Más var móður og másandi í pontu ákvað Obba besta bara að taka smá orkublund. Það getur nefnilega tekið svolítið á að vera til. Tommi á Búllunni hvað?!
Nýjasti þáttur Spursmála er aðgengilegur í heild sinni í spilaranum hér að neðan:
Aukin ógn vegna ofbeldisfullrar hægri öfgahyggju
Dægurhiti aldrei hærri í Reykjavík í apríl
ESB frestar aðgerðum gegn Bandaríkjunum
Olíuverðslækkun skilað sér að litlu leyti
Afkomendur íslenskra háhyrninga fastir
Hlutabréfavísitölur rjúka upp í Bandaríkjunum eftir stefnubreytingu
Hanna Katrín: „Þessi leiðrétting stendur“