Innlent | mbl | 28.4.2025 | 11:44

„Ekki örugg heima hjá okkur“

Svava og Sonja eru með böggum hildar yfir afdrifum kólumbísks fóstursonar síns, Oscars Andres Florez Bocanegra, sem íslensk yfirvöld hafa nú vísað frá landinu öðru sinni. Ljósmynd/Aðsend

„Þegar maður fær svona svör, að það sé bara verið að vísa í lögin og þeim finnist ekkert óeðlilegt við að senda barn úr landi verðum við náttúrulega að bregðast við,ׅ“ segir Sonja Magnúsdóttir í samtali við mbl.is, en þau Svavar Jóhannsson eiginmaður hennar hafa hlotið þjóðarathygli undanfarnar vikur fyrir baráttu þeirra gegn því að fóstursonur þeirra, Oscar Anders Florez Bocanegra, verði sendur til Kólumbíu að undirlagi íslenskra yfirvalda.

Fjölskyldan í Hafnarfirði hefur nú sent Guðmundi Inga Kristinssyni, mennta- og barnamálaráðherra, bréf þar sem hún fer þess á leit að ráðherra láti rannsaka aðild flóttateymis Hafnarfjarðar að máli Oscars.

Frétt af mbl.is

Óttast brottvísun í skjóli nætur

Drengurinn varð sautján ára um páskana og liggur öll kólumbíska fjölskyldan hans undir líflátshótunum kólumbískra misindismanna, eins og mbl.is hefur greint frá, ástand sem spratt af rekstri föður Oscars og lauk með því að hann lenti í vanskilum með svokölluð verndargjöld til staðarmafíunnar. Sú skuld fyrnist ekki þótt rekstri sé hætt og eru Oscar og báðir foreldrar hans nú á dauðalista bölmenna þessara hvar sem til þeirra næst.

Eitt öruggasta land í heimi, en...

Við hverju býstu núna, þegar litið er til viðbragða stjórnvalda fram til þessa?

„Auðvitað vonast ég eftir því að nú verði tekin einhver ákvörðun í hans máli, í það minnsta að honum verði ekki brottvísað á meðan verið er að skoða mál hans,“ svarar Sonja, málið hafi haft alvarleg áhrif á andlega heilsu allrar fjölskyldunnar.

„Þegar maður upplifir sig ekki lengur öruggan heima hjá sér, hrekkur í kút þegar maður heyrir í bíl, þá er fokið í flest skjól,“ heldur hún áfram. „Ísland er eitt öruggasta land í heimi og við upplifum okkur ekki örugg heima hjá okkur. Það er mjög alvarlegt.“

Frétt af mbl.is

Hyggst ekkert segja um mál Oscars

Búið sé að taka skólann af Oscari, hann þorir ekki lengur að mæta í Flensborgarskólann í Hafnarfirði þar sem lögregla sótti hann inn á salerni í október í fyrra til þess að vísa honum úr landi. „Hann þráir að mennta sig,“ segir fósturmóðir hans með áhersluþunga. „Við vitum að andlegt álag brýst út í líkamlegum einkennum og hann er verkjaður og kvalinn. Þetta er engu barni bjóðandi,“ segir hún enn fremur.

Biðin ein fram undan

Í bréfinu til ráðherra kemur fram að áðurnefnt flóttateymi hafi brotið lög og verkferla við meðferð málsins og látið undir höfuð leggjast að vernda Oscar þegar sannað hafi verið að drengurinn hafi verið beittur andlegu og líkamlegu ofbeldi af hendi föður síns. Segir svo:

Þegar Oscar var fluttur úr landi með ofbeldisfullum föður í október sl. var opið barnaverndarmál til staðar vegna þess ofbeldis sem hann hafði mátt sæta af hálfu föður síns en flóttateymið gerði ekkert til að vernda Oscar. Neitar barnavernd í þeim efnum að taka ábyrgð a mistökum sínum. Oscar lýtur nú umsjár barnaverndar Suðurnesjabæjar sem fylgdarlaust barn. Við förum því fram á það við mennta- og barnamálaráðherra að hann beiti sér fyrir því að Oscar verði kyrrsettur í ljósi mjög viðkvæmrar stöðu hans. Mál hans er enn til meðferðar hjá stjórnvöldum sem ber lagaleg skylda til að rannsaka málið og kanna aðstæður hans persónulega og í heimalandi.

Aðspurð segir Sonja nú biðina eina fram undan hjá þeim Svavari, Oscari og öðrum börnum þeirra hjóna. „Ég held að fólk geti ekki einu sinni ímyndað sér hvernig það er að vera í þessum rússíbana allan sólarhringinn. Maður vaknar með þungan hjartslátt og spyr sig hvað taki við í dag. „Þetta er bara mjög erfitt,“ segir Sonja Magnúsdóttir að lokum, jafn óviss nú og dagana örlagaríku í október um hvað við taki í lífi Oscars og þeirra fjölskyldunnar í erfiðu máli þar sem óvissan nagar nótt sem nýtan dag.

Frétt af mbl.is

„Við erum bara hálflömuð“

Hér má lesa erindi fjölskyldunnar til ráðherra í heild sinni:

[ávarp til Guðmundar Inga]

Við undirrituð Sonja Magnúsdóttir, Svavar Jóhannsson og fjölskylda óskum eftir því að Mennta- og barnamálaráðuneytið rannsaki aðild flóttateymis Hafnarfjarðar að barnaverndarmáli Oscars Anders Bocanegra Florez fæddur 19. apríl 2008.

Flóttateymi Hafnarfjarðar braut lög og verkferla við meðferð máls hans og lét í léttu rúmi liggja að vernda Oscar þegar sannað var að drengurinn var beittur andlegu og líkamlegu ofbeldi af hendi föður síns. Þegar Oscar var fluttur úr landi með ofbeldisfullum föður í október sl. var opið barnaverndarmál til staðar vegna þess ofbeldis sem hann hafði mátt sæta af hálfu föður síns en flóttateymið gerði ekkert til að vernda Oscar. Neitar barnavernd í þeim efnum að taka ábyrgð a mistökum sínum.

Oscar lýtur nú umsjár barnaverndar Suðurnesjabæjar sem fylgdarlaust barn. Við förum því fram á það við mennta- og barnamálaráðherra að hann beiti sér fyrir því að Oscar verði kyrrsettur í ljósi mjög viðkvæmrar stöðu hans. Mál hans er enn til meðferðar hjá stjórnvöldum sem ber lagaleg skylda til að rannsaka málið og kanna aðstæður hans persónulega og í heimalandi.

Allir sérfræðingar BUGL og sérfræðilæknar af Landspítalanum gefa samróma álit í læknabréfi um að Oscari stafi bráð hætta af því að vera brottvísað og það stefni hans geðheilsu í hættu. Einnig erum við með greinargerð félagsráðgjafa með sérfræðiþekkingu í áfallastreitu, EMDR, sem hefur komið að hans máli síðustu 16 mánuði. Hún telur hann með flókna áfallasögu en hér á Íslandi upplifi hann sig öruggan og frjálsan og eigi hér fjölskyldu og vini. Ljóst er að hann á sér enga framtíð ef hann verður fluttur á brott.

Lágmarkskröfur hvers barns eru að það upplifi sig öruggt innan veggja heimilisins og sé einnig öruggt innan veggja skólans sem það gengur í. Oscar upplifir sig ekki öruggan neins staðar eftir úrskurðinn sem kveður á um það að taka ekki umsókn hans til meðferðar og brottvísa honum til Kólumbíu. Oscar þráir heitt að geta verið heima hjá sér öruggur og geta farið í skólann sem hann elskar.

Oscar er með flókna áfallasögu sem kallar á aðkomu sérfræðinga. Hann er búinn að vera skelfingu lostinn eftir að hafa fengið þennan úrskurð og telur að líf sitt endi fljótlega. Hann sefur ekki, borðar ekki og líður hræðilega illa ásamt öðrum heimilismeðlimum þar á meðal börnum okkar hjóna sem óttast mjög um hann. Þau skilja ekki að það sé ekki verið að vernda barn sem beitt hefur verið miklu ofbeldi. Hann sér enga framtíð verði honum vísað úr landi þegar hans eina von og ósk er að búa hjá okkur um ókomna tíð.

Þetta barn hefur verið beitt miklu ofbeldi af nákomnum aðilum og fékk hugrekki til að standa upp og segja frá en hefur ítrekað verið beittur ofbeldi áfram í formi fordóma og aðgerðarleysis stofnana sem áttu að vernda hann.

Við erum tilbúin í samtal hvenær sem ráðherra hefur tækifæri til þess, en minnum á að hvern dag, jafnvel hverja klukkustund er Oscar í algjörri óvissu um líf sitt og framtíð enda liggur fyrir ákvörðun um brottvísun sem getur komið til framkvæmda hvenær sem er. Því skiptir máli að bregðast fljótt við þessu erindi.