Innlent | Morgunblaðið | 4.5.2025 | 13:35 | Uppfært 21.5.2025 13:33

Um 100 konur í Léttsveit Reykjavíkur

Gísli Magna og Arnhildur Valgarðsdóttir fara fyrir kór og hljómsveit. mbl.is/Eggert Jóhannesson

Léttsveit Reykjavíkur fagnar 30 ára afmæli á árinu og heldur viðamikla afmælistónleika í Reykjavík, á Akureyri og Raufarhöfn á næstunni. Kórinn kemur fyrst fram í Háskólabíói sunnudaginn 11. maí og hefjast tónleikarnir klukkan 17.00. Sungið verður í pallíettum og glimmeri frá kl. 20.00 fimmtudaginn 15. maí í Akureyrarkirkju og einnig í félagsheimili Raufarhafnar frá kl. 17.00 laugardaginn 17. maí.

„Við leggjum meira í þessa tónleika en alla jafna vegna tímamótanna,“ segir Ásdís Þórhallsdóttir, sem sungið hefur í kórnum í samtals sex ár. Dagskráin sé viðameiri og lengri en venjulega og engir sérstakir gestasöngvarar komi fram heldur verði kórinn í sviðsljósinu með hljómsveitinni.sem spilar með honum. „Við höfum æft stíft í vetur og dagskráin er sannkölluð afmælis- og gleðisprengja.“

Kórinn starfaði fyrst sem Léttsveit Kvennakórs Reykjavíkur en varð sjálfstæður árið 2000. Gísli Magna er stjórnandi Léttsveitarinnar en hann tók við af Jóhönnu Þórhallsdóttur sem stjórnaði kórnum fyrstu 17 árin. Arnhildur Valgarðsdóttir er meðleikari og í hljómsveitinni á tónleikunum en hana skipa auk hennar Diddi Guðnason trommuleikari, Gunnar Hrafnsson bassaleikari, Matthías Stefánsson gítar-, fiðlu- og mandólínleikari, Pétur Valgarð Pétursson gítarleikari og Stefán Örn Gunnlaugsson hljómborðsleikari.

Létt yfir kór og efnisskrá

Á fjölbreyttri efnisskrá eru ballöður og dúndrandi popp, til dæmis lög eftir Bubba Morthens, Gunnar Þórðarson, Magnús Eiríksson, Joni Mitchell, Radiohead og U2. „Við syngjum mörg af okkar uppáhaldslögum í frábærum, hugljúfum og fallegum útsetningum sem eru allar eftir Gísla Magna og Aðalheiði Þorsteinsdóttur, sem var lengi meðleikari okkar. Nafnið Léttsveitin er lýsandi fyrir bæði lagavalið og efnistökin.“

Um 100 konur eru í Léttsveitinni og er þetta sennilega fjölmennasti kór landsins. Eins og nafnið gefur til kynna er létt yfir hópnum og Ásdís segir að stemningin sé sérstaklega góð. Konurnar komi úr öllum stéttum og séu á öllum aldri. „Þetta er samfélag sem hefur byggst upp á 30 árum og sumar konurnar hafa verið með frá upphafi.“

Ásdís byrjaði söngferilinn í kór Menntaskólans í Hamrahlíð og mörgum árum eftir útskrift segist hún hafa saknað söngsins. „Ég þekkti Jóhönnu Þórhallsdóttur, þáverandi stjórnanda Léttsveitarinnar, og hún tók mig inn í kórinn. Þetta er skemmtilegt samfélag og ég sogaðist inn í það enda annað ekki hægt, því félagsskapurinn er svo góður og skapar ómetanlegan vinskap.“

Kórinn hefur verið duglegur að ferðast innan lands sem utan og að þessu sinni verður farið norður og fyrrnefndir tónleikar haldnir í ferðinni. „Eftir tónleikana á Akureyri förum við í skemmti- og óvissuferð út í Flatey á Skjálfanda og höldum svo syngjandi áfram til Raufarhafnar.“