Hótaði starfsmanninum uppsögn á Slack

Ingólf­ur Ragn­ar Ax­els­son, eig­andi ferðaþjón­ustu­fyr­ir­tæk­is­ins Hval­vörðugils­læks sem var í síðustu viku sektað af Fé­lags­dómi fyr­ir að hóta starfs­manni upp­sögn gengi hann í stétt­ar­fé­lag, hef­ur áður sætt gagn­rýni fyr­ir að brjóta á rétt­ind­um starfs­manna fyr­ir­tækja sinna en nokkuð hef­ur verið fjallað um fyr­ir­tæki hans í fjöl­miðlum.

Þann 30. apríl var fyr­ir­tækið Hval­vörðugils­læk­ur sektað um 1.3 millj­ón­ir króna fyr­ir að hafa hótað starfs­manni upp­sögn ef hann gengi í Verka­lýðsfé­lags Suður­lands. Þá var fyr­ir­tæk­inu gert að greiða 600 þúsund krón­ur í máls­kostnað.

Þetta kem­ur fram í niður­stöðu Fé­lags­dóms í mál­inu en í henni má finna skila­boð sem Ingólf­ur Ragn­ar, eig­andi fyr­ir­tæk­is­ins, sendi á starfs­mann­inn á sam­skipta­for­rit­inu Slack í kjöl­far þess að starfsmaður­inn gerði fyr­ir­tæk­inu grein fyr­ir því að hann hygðist ganga í Verka­lýðsfé­lag Suður­lands.

Skila­boðin voru hót­un

„Ef þú vilt ganga í stétt­ar­fé­lagið sem þú varst í verður þér sagt upp, bara svo
það sé al­veg skýrt,“ sendi Ingólf­ur meðal ann­ars á starfs­mann­inn og í öðrum skila­boðum skrifaði hann:

„Þú skalt því end­ur­skoða tölvu­póst­inn sem þú send­ir á bók­haldið um að
ganga í stétt­ar­fé­lagið eða fara að leita að nýrri vinnu.“

Fé­lags­dóm­ur viður­kenndi í ákvörðun sinni að skila­boðin feli í sér hót­an­ir um upp­sögn á ráðninga­samn­ingi og væru brot á lög­um um stétt­ar­fé­lög og vinnu­deil­ur.

Áður kvartað yfir sama broti

Þetta er ekki í fyrsta skipti sem mál tengd fyr­ir­tækj­um Ing­ólfs Ragn­ars rata í fjöl­miðla en hann hef­ur verið áber­andi inn­an ferðaþjón­ustu­geir­ans síðustu ár og rek­ur meðal ann­ars ferðaþjón­ustu­fyr­ir­tæk­in Trölla­ferðir og Trölla­hót­el.

Í lok árs 2023 greindi Heim­ild­in frá því að fimm starfs­menn Trölla­ferða hefðu leitað til stétt­ar­fé­lag­ana VR og Leiðsagn­ar vegna þess að þeir töldu brotið á rétt­ind­um sín­um í starfi.

Gagn­rýni starfs­manna fólst meðal ann­ars í að þeir hafi ekki fengið greidd laun sam­kvæmt kjara­samn­ingi og að þeim hafi verið meinað að vera í stétt­ar­fé­lagi.

Þá fjallaði Morg­un­blaðið árið 2019 um kröf­ur ferðaþjón­ustu­fyr­ir­tæk­is­ins Arcan­um og tíu land­eig­enda við Sól­heimasand um að leggja á lög­bann vegna skipu­lagðra hjóla­ferða sem Trölla­ferðir voru með á sand­in­um að flug­vélarflak­inu sem þar er að finna. Þeirri kröfu var hafnað.

Skilaði 122 millj­óna hagnaði

Það er þó ekki svo að all­ar frétt­ir um fyr­ir­tæki Ing­ólfs Ragn­ars hafi fjallað um mála­ferli og um­kvart­an­ir en árið 2019 birt­ist um­fjöll­un um vel­gengni Trölla­ferða á mbl.is.

Frétt af mbl.is

Ekki öll nótt úti í ferðaþjón­ust­unni

Þar var rakið hvernig fyr­ir­tækið skilaði 122 millj­óna króna hagnaði eft­ir skatta árið 2018, sam­an­borið við 3,7 millj­ón­ir árið áður. Tekj­ur fé­lags­ins námu 966 millj­ón­um króna árið 2018, en voru 431 árið 2017.

Um­fjöll­un um Ingólf Ragn­ar hef­ur ekki ein­skorðast við um­fjöll­un í inn­lend­um fjöl­miðlum en árið 2017 fjallaði breski miðill­inn In­depend­ant um mis­heppnaðan brand­ara Ing­ólfs um út­göngu Bret­lands úr Evr­ópu­sam­band­inu.

• Blogga um frétt