Sigurður dæmdur í átta ára fangelsi
Setja bókamerki
Héraðsdómur Reykjavíkur hefur dæmt Sigurð Kristinsson í átta ára fangelsi fyrir það sem kallað hefur verið stærsta kristal metamfetamínmál Íslandssögunnar.
Meðákærðu Agurim Xixa, Baldur Þór Sigurðarson, Sigfús Bergmann Svavarsson og Elsa Ruth Róbertsdóttir munu einnig sæta fangelsisvist en maður sem í dómnum er nefndur Y hefur verið sýknaður af kröfum ákæruvaldsins.
Sexmenningarnir sem allir hafa neitað sök voru ákærðir fyrir skipulagða brotastarfsemi og stórfellt fíkniefnalagabrot, sem ákærðu sammæltust um að fremja. Stóðu þau saman að innflutningi á 5.733,60 g af metamfetamín kristöllum, ætluðum til söludreifingar hér á landi. Efnin voru falin í bifreið af gerðinni Daimler Double Six sem kom til Þorlákshafnar 11. október með flutningaskipinu Mykines frá Rotterdam í Hollandi.
Lögregla lagði hald á fíkniefnin og skipti þeim út fyrir gerviefni áður en bifreiðin var afhent þeim Sigfúsi, Baldri og Y þann 24. október og færðu þeir Agurim bifreiðina í Reykjavík þar sem hann reyndi árangurslaust að fjarlægja efnin úr bifreiðinni. Daginn eftir flutti hann bifreiðina, ásamt Sigurði, að hesthúsahverfi þar sem Sigurður rétti Agurim og Elsu efnin og báru þau efnin inn í nærliggjandi hesthús.
Hefur verið sakfelldur áður
Sigurður hefur hefur áður verið sakfelldur fyrir stórfelld fíkniefna- og skattalagabrot.
Héraðsdómur Reykjaness dæmdi hann í 20 mánaða skilorðsbundið fangelsi fyrir meiri háttar skattalagabrot í rekstri verktakafyrirtækisins SS verks ehf. árið 2018 og var honum gert að greiða 137 milljóna króna sekt til ríkissjóðs.
Árið 2019 var hann dæmdur í fjögurra og hálfs árs fangelsi í Héraðsdómi Reykjavíkur fyrir aðild að Skáksambandsmálinu svokallaða.
Lögregla hafði fylgst með ferðum ákærðu
Fram kemur í dómnum að málsatvik séu að mestu óumdeild og að á meðal helstu sönnunargagna séu samtímagögn með hljóðupptökum af samtölum ákærðu, myndbandsupptökum, ljósmyndum og upptökum af símtölum milli ákærðu, sem gefi glögga mynd af atburðarásinni.
Þannig aflaði lögregla m.a. dómsúrskurða sem veittu heimild til þess að koma fyrir hljóð- og myndupptökubúnaði undir Daimlerbifreiðinni og enn fremur var komið fyrir hljóðupptökubúnaði í bifreið ákærða Sigfúsar sem hann og ákærðu Baldur og Y héldu til í.
Hafði lögregla því fylgst náið með ferðum ákærðu allt frá því Daimler-bifreiðin kom til landsins 11. október 2024 og þar til þeir voru handteknir 25. október.
Niðurstöður dómsins
Sigurður Kristinsson hefur verið dæmdur í átta ára fangelsi og er gert að greiða þrjá fjórðu hluta sakarkostnaðar, samtals 9.229.714 krónur, þar með talda þrjá fjórðu hluta málsvarnarlauna skipaðs verjanda hans, Hilmars Magnússonar lögmanns, 5.674.860 króna, og þrjá fjórðu hluta annars sakarkostnaðar, 3.554.854 króna, með ákærðu Agurim, Baldri og Sigfúsi, en einn fjórði hluti sakarkostnaðar greiðist úr ríkissjóði.
Meðákærði, Agurim Xixa, hefur verið dæmdur í fimm og hálfs árs fangelsi og gert að greiða þrjá fjórðu hluta sakarkostnaðar sem er samtals 9.335.310 krónur, þar með talda þrjá fjórðu hluta málsvarnarlauna skipaðs verjanda hans, Snorra Sturlusonar lögmanns, 5.674.860 króna, auk þrjá fjórðu hluta aksturskostnaðar, 105.596 króna, og þrjá fjórðu hluta annars sakarkostnaðar, 3.554.854 króna, með ákærðu Baldri, Sigfúsi og Sigurði, en einn fjórði hluti sakarkostnaðar greiðist úr ríkissjóði.
Baldur Þór Sigurðarson hefur verið dæmdur í fjögurra ára fangelsi og gert að greiða þrjá fjórðu hluta sakarkostnaðar sem er samtals 9.338.140 krónur, þar með talda þrjá fjórðu hluta málsvarnarlauna skipaðs verjanda hans, Inga Freys Ágústssonar lögmanns, 5.766.930 króna, auk þrjá fjórðu hluta aksturskostnaðar, 16.356 króna, og þrjá fjórðu hluta annars sakarkostnaðar, 3.554.854 króna, með ákærðu Agurim, Sigfúsi og Sigurði, en einn fjórði hluti sakarkostnaðar greiðist úr ríkissjóði.
Sigfús Bergmann Svavarsson hefur verið dæmdur í þriggja og hálfs árs fangelsi og gert að greiða þrjá fjórðu hluta sakarkostnaðar, samtals 9.849.094 krónur, þar með talda þrjá fjórðu hluta málsvarnarlauna skipaðs verjanda hans, Evu Dóru Kolbrúnardóttur lögmanns, 6.294.240 króna, og þrjá fjórðu hluta annars sakarkostnaðar, 3.554.854 króna, með ákærðu Agurim, Baldri og Sigurði, en einn fjórði hluti sakarkostnaðar greiðist úr ríkissjóði.
Elsa Ruth Róbertsdóttir hefur verið dæmd í 10 mánaða fangelsi en fram kemur í dómnum að fullnustu refsingarinnar skuli frestað. Komi til afplánunar skal gæsluvarðhald dragast frá refsingunni, líkt og hjá meðákærðum. Þá er henni gert að greiða málsvarnarlaun skipaðs verjanda hennar, Þorgils Þorgilssonar lögmanns, 3.509.820 krónur, að meðtöldum virðisaukaskatti.
Maður sem nefndur er Y í dómnum hefur verið sýknaður af kröfum ákæruvaldsins.
Varðhald framlengt á grundvelli almannahagsmuna
Fyrrverandi borgarstjórar gagnrýndu Veitur
„Það er verið að gera rannsóknir pólitískar“
Leit heldur áfram: Staðan metin fram eftir kvöldi
Byggingarleyfi án grenndarkynningar
Ummælin séu tilhæfulaus og tilbúningur
Ísrael samþykkir tillögu um vopnahlé