Fimm skilorðsmánuðir fyrir brot í nánu sambandi

Karl­maður hlaut á föstu­dag­inn fimm mánaða skil­orðsbund­inn dóm í Héraðsdómi Reykja­vík­ur fyr­ir brot í nánu sam­bandi þar sem hon­um var gefið að sök að hafa „end­ur­tekið og á al­var­leg­an hátt með of­beldi og hót­un­um, ógnað lífi, heilsu og vel­ferð fyrr­ver­andi sam­býl­is­konu sinn­ar.

Hafði hátt­semi manns­ins meðal ann­ars fal­ist í því að veit­ast með of­beldi og ógn­un­um að kon­unni og kasta henni á glugga­kistu í íbúðinni með þeim af­leiðing­um að hún hlaut mar á baki, en fram kem­ur í máls­gögn­um, er lögð voru fyr­ir dóm­inn, að kon­an óttaðist um líf, heilsu og vel­ferð sína.

Meðal annarra ákæru­atriða má nefna að ákærða var borið á brýn að hafa eitt skiptið tekið um oln­boga sam­býl­is­kon­unn­ar fyrr­ver­andi, hent henni í gólfið, öskrað á hana og verið ógn­andi í fram­komu. Er henni auðnaðist að leita skjóls á baðher­bergi íbúðar­inn­ar og læsa að sér braust ákærði inn í her­bergið, öskraði á hana og sýndi enn af sér ógn­andi fram­komu auk þess að veit­ast að fórn­ar­lambi sínu og veita því tölu­verða áverka er tí­undaðir eru í dóm­in­um.

Fimm mánuðir auk fjár­út­láta

Lögðu lög­reglu­menn, heim­il­is­lækn­ir og fleiri vitni skýrsl­ur sín­ar fram fyr­ir dómi og þótti dóm­ara sannað að ákærði hefði gerst sek­ur um fram­an­greind brot gegn sam­býl­is­kon­unni fyrr­ver­andi svo óyggj­andi þætti.

Auk áður­nefndr­ar fimm mánaða refs­ing­ar skil­orðsbund­inn­ar var ákærða gert að greiða kon­unni 860.000 krón­ur með vöxt­um auk þriggja fjórðu hluta af mál­svarn­ar­laun­um skipaðs verj­anda síns, sama hlut­falls af þókn­un rétt­ar­gæslu­manns brotaþola, útlagðan kostnað rétt­ar­gæslu­manns og rúm­ar 20.000 krón­ur í ann­an sak­ar­kostnað.

• Blogga um frétt