Laun vangreidd um langt árabil

Slökkviliðsstjóri í Norðurþingi er sagður hafa van­greitt starfs­mönn­um sín­um laun yfir margra ára tíma­bil. Laun­in nema um 70 millj­ón­um og hafa starfs­menn fengið helm­ing þeirra greidd til baka frá sveit­ar­fé­lag­inu. 

Þetta seg­ir Ágúst Sig­urður Óskars­son, trúnaðarmaður slökkviliðsins í Norðurþingi.

Að hans sögn eru nú starfs­menn slökkviliðsins um 60 tals­ins og starfa á Húsa­vík, Kópa­skeri og Raufar­höfn.

Þeir hafi nú þegar fengið end­ur­greitt frá sveit­ar­fé­lag­inu 35 millj­ón­ir, til að mynda fyr­ir boðtækja­greiðslur, greiðslu fyr­ir vinnu, bakvakt­ir og leiðrétt­ingu vegna of lágra launa.

Van­rækti að setja starfs­menn í rétt­an launa­flokk

Í sam­komu­lagi sem gert var á milli stjórn­sýslu Norðurþings og starfs­manna slökkviliðsins, sem mbl.is hef­ur und­ir hönd­um, seg­ir að sér­stök skoðun hafi farið fram á ár­inu 2024 um ýmis mál­efni og kjara­mál hjá Slökkviliði Norðurþings. Þar hafi víða verið pott­ur brot­inn.

Seg­ir í sam­komu­lag­inu að sam­kvæmt ákvörðun slökkviliðsstjór­ans hafi boðtækja­greiðslur ekki verið greidd­ar á Húsa­vík fyr­ir árið 2022 og eft­ir það. Boðtækja­greiðslur hafi aldrei verið greidd­ar á Kópa­skeri og Raufar­höfn.

Þá hafi, einnig sam­kvæmt ákvörðun slökkviliðsstjór­ans, verið greidd­ar tvær klukku­stund­ir fyr­ir æf­ingu slökkviliðs sem fór fram 18. júní 2024 í stað fjög­urra klukku­stunda eins og kjara­samn­ing­ur gerði ráð fyr­ir. Þá seg­ir að fjöldi dæma séu síðustu ár um ranga tíma­skrift.

Sömu­leiðis hafi slökkviliðsstjór­inn van­rækt að setja starfs­menn Norðurþings í rétt­an launa­flokk og álagsþrep í kjöl­far breyt­inga á kjara­samn­ingi árið 2022.

Seg­ir jafn­framt í sam­komu­lag­inu að dæmi séu um ára­tuga­langa van­greiðslu launa og kjara til starfs­mann­anna.

Yf­ir­menn hafi mis­notað traust starfs­manna sinna

Í sam­tali við mbl.is seg­ir Ágúst starfs­menn slökkviliða á lands­byggðinni tíma­vinnu­menn sem hafi annað aðalstarf. Þátt­taka hjá flest­um sé því sam­fé­lags­legt fram­lag og hitt­ast þeir ein­ung­is á æf­ing­um og í út­köll­um. Hefðbundið vinnustaðasam­starf sé ekki fyr­ir hendi og er því lagt mikið traust á vinnu­veit­end­ur sína sem eru slökkviliðsstjór­ar og sveit­ar­fé­lög.

Hann seg­ir að í máli starfs­manna slökkviliðs Norðurþings hafi slökkviliðsstjór­inn og yf­ir­menn sveit­ar­fé­lags­ins mis­notað það traust og brugðist starfs­mönn­um illa.

Slökkviliðsstjóri slökkviliðsins í Norðurþingi er Grím­ur Kára­son og er hann einnig formaður slökkviliðsstjóra á Íslandi. Sveit­ar­stjóri Norðurþings er Katrín Sig­ur­jóns­dótt­ir.

„Hann vildi ekki að það yrði kos­inn trúnaðarmaður“

Seg­ir Ágúst málið eiga sér lang­an aðdrag­anda og að starfs­menn hafi leitað leiðrétt­inga í mörg ár. Í árs­byrj­un 2024 hafi starfs­menn svo tekið sig sam­an, m.a. í sam­vinnu við Lands­sam­band slökkviliðs- og sjúkra­flutn­inga­manna (LSS) og stétt­ar­fé­lagið Fram­sýn, og kosið sér trúnaðarmann sem falið var umboð til að vinna að um­bót­um. Fór svo að Ágúst var kjör­inn trúnaðarmaður starfs­manna.

„Þegar við ákváðum að kjósa trúnaðarmann og send­um fund­ar­boð út þá hringdi hann í mig og öskraði í sím­ann. Því að hann vildi ekki að það yrði kos­inn trúnaðarmaður og það ætti ekki að vera trúnaðarmaður,“ seg­ir Ágúst.

Þá seg­ir hann í kjöl­far kosn­ing­ar trúnaðar­manns hafi verið farið í að skoða launa­mál. 

Van­greiðslurn­ar nái 10-12 ár aft­ur í tím­ann

Hann seg­ir launa­mál, starfs­kjör og æf­ing­ar hafa verið í ólestri og að farið hafi verið í krefjast leiðrétt­inga sem Grím­ur og Katrín hafi tekið mjög illa í til að byrja með.

„Þegar þetta fer í há­mæli þá geng­ur slökkviliðsstjór­inn í það, í ág­úst 2024, að láta kjósa aðra trúnaðar­menn á Kópa­skeri og Raufar­höfn, bara með það að augnamiði að vængstífa það starf sem við vor­um að gera fyr­ir hóp­inn, þ.e.a.s. til þess að hindra það að við fær­um fram á þess­ar leiðrétt­ing­ar.“

Launa­leiðrétt­ing­arn­ar nema sem fyrr seg­ir 35 millj­ón­um króna og ná fjög­ur ár aft­ur í tím­ann. Seg­ir Ágúst sveit­ar­fé­lagið bera svo fyr­ir sig fyrn­ing­ar­tíma þegar kem­ur að laun­um sem nái lengra aft­ur í tím­ann. Hann seg­ir van­greiðslurn­ar ná 10-12 ár aft­ur í tím­ann.

Með 200-300 krón­ur á tím­ann á bakvakt

Þá seg­ir hann að auk þeirra atriða sem slökkviliðið og Norðurþing hafi nú verið knú­in til að leiðrétta sé unnið að nokkr­um mál­um til viðbót­ar, m.a. sem varða laun og starfs­kjör þeirra sem starfa á Kópa­skeri og Raufar­höfn.

Þar eigi m.a. eft­ir að leiðrétta laun og greiða fyr­ir vinnu. Einnig sé í skoðun hvort heim­ilt sé að greiða þar lægri bakvakt­ar­laun en ann­ars staðar í stofn­un­um rík­is og sveit­ar­fé­laga á Íslandi en að sögn Ágúst­ar hafa starfs­menn á Kópa­skeri og Raufar­höfn fengið 200-300 krón­ur á tím­ann fyr­ir að vera á bakvakt á meðan koll­eg­ar þeirra ann­ars staðar fá 1.200-1.500 krón­ur.

Slökkviliðsstjór­inn sjálf­ur sé með 2.000-2.500 krón­ur á tím­ann á bakvakt.

„All­ir starfs­menn hjá ríki og sveit­ar­fé­lög­um fá sömu laun fyr­ir sömu vinnu (bakvakt) án til­lits til bú­setu. Mat stétt­ar­fé­lag­anna er að ekki sé heim­ild fyr­ir þessu og því var farið fram á leiðrétt­ing­ar.“

Málið á borði LSS

Seg­ir Ágúst að þessi hluti máls­ins sé til um­fjöll­un­ar hjá Lands­sam­bandi slökkviliðs- og sjúkra­flutn­inga­manna (LSS) og Sam­bandi ís­lenskra sveit­ar­fé­laga.

Bjarni Ingimars­son, formaður LSS, staðfest­ir að mál starfs­manna slökkviliðs Norðurþings sé á borði hjá fé­lag­inu og að nú sé helst verið að skoða greiðslur til starfs­manna fyr­ir bakvakt­ar­tíma.

„Við erum fyrst og fremst að reyna að leita viður­kenn­ing­ar á því að það sé verið að greiða rangt. Um leið og það er komið þá þarf sveit­ar­fé­lagið ein­fald­lega að reikna þetta aft­ur og greiða þetta,“ seg­ir Bjarni í sam­tali við mbl.is.

Tvær æf­ing­ar á fimm árum

Að sögn Ágúst­ar hafa starfs­menn slökkviliðs Norðurþings einnig gagn­rýnt innra starf eins og skipu­lag æf­inga, sem sé eitt það mik­il­væg­asta þegar kem­ur að slökkviliði og bráðaþjón­ustu.

Seg­ir hann að á fimm ára tíma­bili, frá 2019-2024, hafi aðeins tvær æf­ing­ar verið haldn­ar fyr­ir slökkviliðsmenn á Kópa­skeri og Raufar­höfn.

Nefn­ir hann að sam­kvæmt upp­lýs­ing­um frá bruna­mála­sviði Hús­næðis- og mann­virkja­stofn­un­ar, sem starfar sem eft­ir­litsaðili slökkviliða, eigi að lág­marki 20 klukku­tím­ar á ári að fara í æf­ing­ar. Á Kópa­skeri og Raufar­höfn hafi klukku­tím­arn­ir sam­tals verið sex á ár­un­um 2019-2024.

Þá seg­ir hann æf­ing­ar á Húsa­vík hafa verið það fáar að aðeins 3-5 reykkafar­ar hafi verið með gild rétt­indi til reykköf­un­ar og slökkvi­starfs inn­an­húss. Fjóra til fimm reykkafara þurfi til að mæta í út­köll svo reykköf­un sé mögu­leg.

Nefn­ir Ágúst að Katrín hafi nú hlutast til um að hafa reglu­leg­ar æf­ing­ar á Húsa­vík, Kópa­skeri og Raufar­höfn sem hafi að mestu gengið eft­ir.

Grím­ur Kára­son og Katrín Sig­ur­jóns­dótt­ir vildu ekki tjá sig um málið að svo stöddu. 

• Blogga um frétt