Schengen-samstarfið voru mistök

Úlfar Lúðvíksson

Það reyndust afdrifarík mistök þegar ákveðið var að Ísland gerðist aðili að Schengen-samstarfinu. Þetta segir Úlfar Lúðvíksson, fyrrverandi lögreglustjóri á Suðurnesjum, í nýju viðtali á vettvangi Spursmála.

Samstarfið felur í sér afnám persónubundins eftirlits á innri landamærum þeirra 27 ríkja sem aðild eiga að því en um leið samstarf evrópskra lögregluliða, sem ætlað er að tryggja öryggi borgara á svæðinu.

Öryggissjónarmið að ganga ekki inn

„Ef maður horfir til öryggissjónarmiða þá ætti Ísland aldrei að hafa farið inn í þetta samstarf,“ segir Úlfar. Hann bendir á að miklir veikleikar séu á hinum svokölluðu innri landamærum. Það hafi berlega komið í ljós vegna ófremdarástands við Miðjarðarhaf þar sem fólk flæðir inn í Evrópu og inn fyrir þessi landamæri án þess að menn fái rönd við reist.

Úlfar segir að þrátt fyrir þetta séu til úrræði til þess að vinna betur úr stöðunni sem skapast á grunni Schengen-samstarfsins. Það sé hins vegar sárgrætilegt að það hafi ekki verið gert og landamærin því að miklu leyti staðið óvarin um langt árabil.

Úlfar Lúðvíksson er nýjasti gestur Stefáns Einars Stefánssonar í Spursmálum. mbl.is/María Matthíasdóttir

Vill að embættismenn víki

Frétt af mbl.is

Ráðuneytisstjórinn víki sökum þjóðaröryggis

Þar beri dómsmálaráðherra ábyrgð en ekki síst Haukur Guðmundsson, ráðuneytisstjóri í dómsmálaráðuneytinu, og Sigríður Björk Guðjónsdóttir ríkislögreglustjóri. Þau eiga bæði sæti í þjóðaröryggisráði. Segir Úlfar að vanræksla þeirra í þessum málum sé þess valdandi að þau eigi bæði að víkja úr embættum sínum.

Viðtalið við Úlfar má sjá og heyra í heild sinni í spilaranum hér að neðan (hefst á 37:19).